देखे खा बनी टंकी, नई आउत पानी

एते हे पानी खे समस्या
एते हे पानी खे समस्या

जिला महोबा, ब्लाक चरखारी, कस्बा चरखारी। एते गोवर्धन प्रांगण में बनी कंाशीराम कालोनी में पानी की बोहतई परेशानी हे। काय से एते बनी टंकी से पानी सप्लाई नई होत आय।
रेखा, सत्यनारायण ओर मुकेश ने बताओ कि लगभग चालिस जने खा एते रहत डेढ़ साल से ज्यादा हो गये हे, पे पानी की समस्या शुरू से झेलत रहे हंे। रुक्साना बताउत हे कि में ब्लाक नम्बर एक के दूसरी मंजिल में रहत हों। मोई तबियत खराब होय के साथे बच्चा भी होय वालो हे। जीखे कारन डाक्टर ने वजन उठायें खा मना करो हे, पे मजबूरी में पानी की भरी बाल्टी तरे के हैण्डपम्प से भर के दो मंजिल के ऊपर चढ़ाने परत हे। नूरजहां बताउत हे कि आपरेटर गुन्नू हमसे सौ रुपइया को महीना मांगत हे, कहत हें कि रुपइया मिले के बाद पानी चलाओ जेहे। हम कहत हें कि अगर हमखा बिल दओ जेहे तभई हम रुपइया देबी। ईखे लाने हमने केऊ दइयां चरखारी तहसील में दरखास दई हे, पे कछू सुनवाई नई भई हे। टंकी आपरेटर गुन्नू बताउत हे कि पांच दिन टंकी न भर पाये खे कारन पानी सप्लाई नई भओ। 7 नवम्बर खा टंकी भराई गई हे। जल्दी ओते पानी पोंहचाओ जेहे। अभे ऊ टंकी जल निगम महोबा के तहत हे। एईसे हम कोनऊ से रुपइया नई ले सकत हें।