दुबारा से घर में घुसो, चोरी करें खे कोशिश

घर देखाउत सुधा
घर देखाउत सुधा

महोबा शहर, कस्बाथाई मोहल्ला। एते 27 अप्रैल 2014 खा परमेश्वरी दयाल के लड़का धर्मेन्द्र के घर में चोरी भई हे। जीखी रिपोर्ट परमेश्वरी दयाल ने मोहल्ले के ही रहे वाले दिनेश खंगार के नामजद महोबा कोतवाली में लिखाई हे। चुनाव को माहोल होय खे कारन अभे रिपोर्ट नई लिखी गई आय।
परमेश्वरी दयाल के लड़का धर्मेन्द्र ने बताओ कि आठ महीना से में ओर मोई ओरत सुधा अपने मताई-बाप से अलग एक कमरा में रहत हते। 27 अप्रैल 2014 खा रात डेढ़ बजे मोहल्ला के ही रहे वाले अभिनन्दन खंगार को लड़का दिनेश आओ ओर हाथ डार के दरवाजा खोल लये, ओर सुधा को जेवर निकार लओ। जभे दिनेश सामान लेके भागन लगो तो हमाई आंख खुल गई। हमने दिनेश खा पकरे की कोशिश करी, पे ऊ भाग गओ। हमने रातई में कोतवाली खा सूचना दई हती। 28 अप्रैल 2014 खा हम रिपोर्ट लिखाउन गये हते, पे अभे तक कारवाही नई भई आय। परमेश्वरी दयाल ने कहो कि अगर एते मोई सुनवाई न होहे तो में बांदा डी.आई.जी. तक दरखास देहों। काय से दिनेश दुबारा मोये घर में चोरी करे खा घुसो हे।
दिनेश के भाई राकेश ने बताओ कि दो साल पुरानी लड़ाई खा लेके ऊ हमाये भाई खा झूठो आरोप लगा के फंसाउत हें। काय से जोन दिन परमेश्वरी दयाल चोरी होय को आरोेप लगाउत हे ऊ दिन हमाओ भाई घर में सोउत हतो।
महोबा कोतवाली के दीवान महेश कुमार राठौर ने बताओ कि परमेश्वरी दयाल दुबारा रिपोर्ट लिखाउन नई आओ आय। अगर रिपोर्ट लिखाउन आहे तो रिपोर्ट लिखी जेहे। ओर कारवाही भी करी जेहे।