दहेज ने ली एक और जान, देखिए चित्रकूट जिले के टिकरा पताई गाँव से

जिला चित्रकूट, ब्लाक रामनगर के गांव टिकरा पताई के मजरा पश्चिम पताई मा 20 मई का शाम के आठ बजे तुलसी के जलै से मउत होइगे हवै। मइके वालेन का आरोप हवै कि दहेज के मांग न पूर होय के कारन से ससुराल वाले तुलसी का जलाके मार डारिन हवैं। तुलसी नौ महीना के गर्भवती रहै। कइयौ दरकी लेवावै गये हन, पै भेजिन नहीं आहीं। ससुराल वाले दहेज मा टीबी,गाड़ी अउर भैंस मांगत रहैं।

माँ कुसुम बताइस हवै कि दहेज मांगत रहे हवै। दारू पीके घरै आवत रहै, तौ मना करिस हवै। नहीं मानत रहै, तौ कहै कि कउनौ दिन मैं जइहौं। बस यहै से इनतान कई दिहिस हवै। भाभी ममता देवी बताइस हवै कि सूचना देय मा बस या बतावत रहैं, कि घर मा आगी लाग गे हवै। या नहीं बतावत रहैं, कि तुलसी आगी मा जल गे हवै। पिता सुखलाल का कहब हवै कि शादी का एल साल होइगे हवैं। एक साल मा चार छह दरकी घरै आई हवै, तौ यहै बतावत रहै कि बाबू लड़ाई झगड़ा करत हवै। कहे कि काम नहीं करत आय। चाचा कुट्टू निषाद का कहब हवै कि लड़की का एक अलग कमरा मा बेड के मारिन हवैं फेर जला दिहिन हवै। यहै से तौ कुछ आवाज नहीं कई पाइस आय। ससुर बताइस हवै कि हम नहीं रहे आहिन बहूँ भर रही हवै। हम सब मड़ई आम के बगीचा मारहे हन।

एसपी चित्रकूट के मनोज कुमार झा का कहब हवै कि आग लगावै के संबंध मा वहिका धारा 304 दहेज उत्पीड़न का मुकदमा लिखाइन हवैं। यहिके जाँच कइके कार्यवाही कीन जई।

रिपोर्टर: नाजनी रिजवी और सुनीता देवी

Uploaded on May 22, 2018