तीन बरस से सड़क बनै का इंतजार

31-07-14 karvi tazaजिला चित्रकूट, ब्लाक पहाड़ी, गांव नहरा मजरा अगरहुंड़ा। अगरहुंड़ा से कमासिन जाये वाली सड़क का बीस बरस पहिले पी.डब्लू.डी. विभाग बनवाइस रहै। या सड़क अगरहुंड़ा से पिलखिनी तक 5 किलो मीटर तीन बरस से खराब हवै। सड़क से रोज का दसन हजार मड़ई आवैं जाय मा परेशान हवै।

पिलखिनी गांव के श्याम, बसहर गांव के सूरज अउर मंजू अगरहुंड़ा गांव के मेड़ेलाल का कहब हवै कि या सड़क से बस जीप सबै साधन निकरत हवैं। सड़क खराब होंय से सवारिन का परेशानी होत हवै अउर रोजै के साधन पंचर होत हवैं। साधन चलावैं वालेन का मुनाफा से ज्यादा घाटा होत हवै। पहिले पी.डब्लू.डी. विभाग से सड़क बनवावैं का सूचना दीन गे हवै, पै आज तक विभाग या सड़क बनवावै का नाम नहीं लिहिस आय। जबै पानी बरसत हवै तौ उंई गढ़वन मा भर जात हवै। यहै से आवैं जाये मा ज्यादा परेशानी होत हवै। जबै दुघर्टना होइ तबै सरकार या सड़क का बनवाई।

पी.डब्लू.डी. विभाग के सहायक अभियन्ता रामकुमार का कहब हवै कि बजट पास होइ तौ सड़क बनवाइ जई।