तीन दिन बिजली रही गोल, यात्री मरे पियासन

एक बूद गला तर करैं का मिल जाय पानी
एक बूद गला तर करैं का मिल जाय पानी

जिला बांदा, ब्लाक नरैनी, कस्बा अतर्रा रेलवे स्टेशन। बांदा जिला मा तीन दिन बिजली गोल होय से 19 अगस्त 2014 का अतर्रा रेलवे स्टेशन मा पियासन के मारे हा-हा कार मची रहै।
यात्रा करै वाली चुनबादी अउर सुनीता बताइन है कि इनतान के गर्मी मा मारे पियासन के गला सूखत रहै। दिन भर स्टेशन मा सप्लाई वाला पानी नहीं आवा। एक हैण्डपम्प है वहिमा यतनी गन्दगी है कि कीड़ा बुजबुजात है। गौरा देवी कहत है कि मोर तीनौं बच्चा तीन घन्टा से पियासे हैं। स्टेशन के पास दुकान भी निहाय कि मोल का पानी खरीद के पिया देई।
अतर्रा रेलवे स्टेशन का प्रबन्धक ए.के. मिश्रा कहिन कि 17 से 20 अगस्त तक सुबेरे 6 बजे से शाम 6 बजे तक बिजली न रहैं से टंकी नहीं भरत रहै। हमार बस मा भी कुछ नहीं आय। यात्री चार दिन तक तडपत रहिगें।