ट्रेन लेट तो बाँदा में बिक्री और सफर दोनों ठप्प

जिला बांदा, कस्बा बांदा एक महीना से लगातार गाड़ी देर से आवत है। काहे से ठंडी के महीना मा कोहरा छावा रहत है। जेहिसे सम्पर्क क्रान्ती, चंबल, महाकौशल अउर बुन्देलखण्ड एक्सप्रेस समेत कइयौ गाड़ी देर से आवत हैं। जेहिसे हेंया के दुकान के बिक्री नहीं होत हैं।
दुकानदार नन्दकिशोर का कहब हवै कि हेंया के मडई गाड़ी देरी से आवै से बहुतै परेशान हैं। दुकानदारी मा बहुतै फरक आवा है। 20-25 दिन से यहै हाल है, चंबल, सम्पर्क क्रान्ती जइसे गाड़ी आपन समय से तीन घंटा देर से आवत हैं। जेहिसे सबहिन का बहुतै परेशानी होत हैं।
दुकानदार बाल किशन बतावत है कि खाय पिये का सामान बना के रख लेइत हन समय से गाड़ी न आवै से सामान ख़राब होइ जात है। अउर हमार नुकशान होत है।
रिक्शा चलावे वाला अतुल अउर विनोद का कहब है कि या समय गाड़ी बहुतै देरी से आवत है जेहिसे ज्यादातर रिक्शा वाले दस बजे के बाद चले जात है यहै कारन बिक्री मा 30 से 40 प्रतिशत तक के कमी आयी है रिक्शा न होय के कारन मड़इन का भी बहुतै परेशानी होत हैं।
रामबृक्ष का कहब है कि इंटर सिटी गाड़ी सात घंटा देरी से आयी हैं। जेहिसे इनतान के ठंडी मा मडइन का स्टेशन मा बइठे का पड़त हैं। हेंया न आगी जलत आय न कउनौ सुविधा रहत है। मड़ई ठण्डी में ठिठुरे मा मजबूर हैं।
मुख्य वाणिज्य निरीक्षण बांदा के संजय कुमार का कहब है कि कोहरा के कारन गाड़ी देरी से आवत है, तौ मड़इन का बहुतै परेशानी होत है। जउन मड़ई स्टेशन मा बइठ के गाड़ी का इन्तजार करत है अउर जउन मड़ई गाड़ी के भीतर फंसे बइठ हैं सबहिन का गाड़ी के देरी से परेशानी होत है। कइयौ गािड़न मा खाय पिये के सुविधा नही रहत है, जेहिसे मड़इन का अउर ज्यादा परेशानी होत हैं कइयौ गाड़ी का रास्ता बदल दीन गा है।
पूर्वा एक्सप्रेस ,स्वतंत्रता सेनानी एक्सप्रेस समेत कइयौ गाड़ी देरी से आवत है।

रिपोर्टर- मीरा देवी

Published on Jan 6, 2017