टोली बनाकर की जाएगी चित्रकूट जिले के पियरीमाफी गाँव की सफाई

जिला चित्रकूट, ब्लाक रामनगर, गांव पियरी माफी मा गंदगी अउर पानी भरे के कारन नाली बजबजात हवै। जेहिसे गर्मी के या मौसम मा खतरनाक बीमारी फइले का खतरा हवै। दुई महीना पहिले या गांव के सफाई कर्मी के मउत होइगें हवै यहै कारन हिंया सफाई नहीं होइ पावत रहै। यहै कारन गांव का साफ-सुथरा बनावै खातिर प्रशासन टोली बनाके सफाई करावत हवै।
फूल कुमारी का कहब हवै कि दुई-ढाई महीना से सफाई नहीं भे आय यहै कारन कीड़ा, मच्छर नाली होइगें हवै अउर बदबू के कारन मुंह दबाके रहे का पड़त हवै। शिवशंकर दिवेदी का कहब हवै कि मड़इन का या गन्दगी से बहुतै परेशानी होत हवै। गांव मा कम से कम एक सफाई कर्मी होवा चाही, जेहिसे गांव के सफाई होइ सकै। काहे से गन्दगी के कारन मच्छर पैदा होत हवै जेहिसे बीमारी फइलत हवै।
प्रधान प्रतिनिधी विनोद मिश्रा का कहब हवै कि सफाई कर्मी के दिल का दौरा पड़े से मउत होइगें रहै, तबै से सफाई नहीं होइ पावत आय। मड़ई आपन घर के सउहें के सफाई कइ लेत हवै। जमादार से नाली के सफाई करा दीने हौं। डीपीआरओ के लगे गये रहे हौं पै अबै कउनौ सफाई कर्मी खातिर आदेश नहीं करिन आय।
एडीओ पंचायत रामलाल मिश्रा का कहब हवै कि सफाई खातिर टोली बनाई जात हवै। टोली के मदद से गांव के सफाई करा दीन जई।

रिपोर्टर- सहोद्रा

Published on Apr 5, 2018