टूटल घर में करई छी गुजारा

मनतोरिया देवी
मनतोरिया देवी

जिला सीतामढ़ी, प्रखण्ड सोनबरसा, पंचायत गांव इन्दरवा, वार्ड नम्बर पन्द्रह के मनतोरिया देवी मजदूर छथिन। जिनकर घर टूटल हई अउर बी.पी.एल. में भी नाम हई। लेकिन पिछड़ी जाति रहे के कारण अभी उनका नाम से इंदिरा आवास न मिलतई।
मनतोरिया देवी पति फेकन महतो कहलथिन कि हम मजदूर आदमी छी रहे ला घर न हय। टूटल घर के बार-बार मरम्मति कके रहई छी। मजदूरी करई छी त परिवार चलई छई अउर बाल-बच्चा के दबाई होई छई। लेकिन घर बनाबे के लेल त ज्यादा रूपइया के जरूरी हई। ईट्टा के घर बनावे मे केहनो गरीब के हालत खराब हो जाई छई। हम सोचले रहली की इंदिरा आवास मिल जइतियई त घर बनावे में कुछ सहयोग हो जाईत।
मुखिया पति अयोधी पासवान कहलथिन कि इंदिरा आवास अभी पिछड़ी जाति में नौ अंक वाला के मिल रहल हई। ओकरा बाद दस वाला के देल जतई। ओई में नाम जोड़ल जतई। प्रखण्ड विकास पदाधिकारी श्री कांत ठाकुर कहलथिन कि शिविर लगाके इंदिरा आवास वितरण होई छई। जेइमे कोई गरबड़ी न हो सकई छई। अगर उनकर नाम लिस्ट मे होतई तब जरूर मिलतई।