झांसी के खैलार में ज़रा सी बारिश होते ही रास्ते से गुज़रना हो जाता है मुश्किल

जिला झांसी, ब्लाक बबीना, गांव खैलार इते अगर तनक पानी बरस जात तो निकरबो मुश्किल हो जात। निकर तक नई पात जब रस्ता में पत्थर डारत तब निकर पात।
पूजा ने बताई के निकरबे में भोत परेशानी होत स्कूल जाबे आबे में छोटे छोटे मोड़ी मोड़ा नई निकर पात। प्रधान नो जाओ सो उते कछु सुनवाई नई होत कह देत बन जेहे बन जेहे और अबे तक नई बनवाई।
परेशा ने बताई के हमाय तो घर में तक पानी भर जात हाथ से भर भर के पानी निकारने परत।
गुत्ती ने बताई के पूरे महोल्ला में नाली की परेशानी हे। पानी भर जात प्रधान के पास गये ते डी एम के पास भी गये ते लेकिन अबे तक कोनऊ सुनवाई नई हो रई।
भगवती ने बताई के हम ओरे भोत परेशान हे। हम तो जोई सोच रए के जो नाली बन जाबे।
हमाय ते पूरे बारह महीना पानी भरो रत सब जघा को पानी इतेई आत। सुभाष नगर साकेत नगर सब जघा को और जा परेशानी चार पांच साल से हो रई।
प्रधान अभय सिंह ने बताई के जा बार पानी ज्यादा पानी बरस गओ सो ज्यादा भर गओ।
हमने देख लओ के ज्यादा परेशानी हो रई सो हमने काम लगवा दओ नालियन के लाने।
वजट चार लाख अन्ठान्वे हजार हे जी में 105 मीटर नाला बनने जो 28 तरीख को बन जेहे।

रिपोर्टर- सफीना और कविता देवी 

21/09/2016 को प्रकाशित

झांसी के खैलार में ज़रा सी बारिश होते ही रास्ते से गुज़रना हो जाता है मुश्किल