झाँसी के युवा छात्र नाराज़, मोदी सरकार नही पूरा की नौकरी का वादा

जिला झांसी, शहर झांसी सरकार बनबे के पहले राजनीतिक पार्टीयन के बोहतई वादे होत। जिनमे से एक वादा युवा छात्रन को रोजगार दुआबे को भी होत। बेरोजगारी को लेके मोड़ी सरकार से करे गये वादो से झांसी के युवा छात्र बोहतई नाराज हे।
नौ जवानो में बोहतई गुस्सा हे के सरकार नौकरी दुआबे के लाने कछू नइ कर रइ। छात्रन को आरोप हे के रेल्वे भर्तीयन में धांधली करी जात जई से बड़े बड़े आदमी रिश्वत देके खरीद लेत जीके मारे पात्र छात्र पीछे रह जात। आदियन को कबो हे के रेलवे के पद खाली रत लेकिन सरकार उनको नइ भरत।
जितेन्द्र और परवेज ने बताई के मोदी जी ने बोली ती के देश में बेरोजगारी को मुद्दा उठा हे। लेकिन उनके ऊचें नेता बोलत के हम युवाओं को रोजगार नइ दे सकत।
अगर रोजगार नइ दे सकत तो फिर का कर हे पिछली साल जो परिक्षाए भइ उनमे बोहतई धांधली भइ और बाके बाद भी रजिल्ट जारी कर दओ। जिने पास होने तो बे बाहर हे। हमने आर टी आई के माध्यम से जबाब भी मांगे लेकिन जबाब नइ दए। अब हम ओरे डी एम् साब को इन्तजार कर रए।
राम प्रताप ने बताई के जिन पेपरन में धाधली भई उन्हें दुवारा करवाने चाहिए तीन साल हो गये भाजपा की सरकार को अबे तक कोनऊ जगह नइ निकारी। अगर जगह नइ निकर हे तो किते जेहे हम ओरे कैसे रोजगार मिल हे।
सुधीर ने बताई बेरोजगारी जो समस्या बन गयी बा को मेन कारन हे के सरकार जो योजना निकारत उनको जमीनी स्तर पे कितने आदमियन को लाभ मिल रओ जो केबो मुश्किल हे।
काय के गरीब के घर में चूल्हों जलत के नइ बासे शासन को कोनऊ मतलब नइया। उन्हें अपनी कुर्सी, सत्ता और एश से मतलब हे।
कारन सिंह चौहान जिला अधिकारी ने बताई के जब छात्र अच्छी तैयारी कर हे और बे बा लायक हुए तबइ संस्था उनको चयन कर हे।

रिपोर्टर- सफीना

02/06/2017 को प्रकाशित