जिला अम्बेडकर, ब्लाक अकबरपुर की जनता ने राशन कार्ड के लिए एसडीएम को दिया ज्ञापन

जिला अम्बेडकरनगर, ब्लाक अकबरपुर ग्रामसभा सिझोलिया अउर बरवा। हिया कै जनता रासन न मिलै से परेसान बाय। पहिले सूची मा नाम रहा रासन मिलत रहा लकिन चार महीना से रासन नाय मिला। कोटेदार कहिन कि सूची मा नाम नाय बाय। येही के बिरोध मा एहिके जनता 9 अगस्त का रैली निकालके एसडीएम का ज्ञापन सौपिन।

श्रीराम कहिन कि चार महीना पहिले रासन मिलत रहा सूची मा नाम भी रहा लकिन अब कोटेदार कहा थे की सूची मा नाम नाय बाय रासन न मिले। जब सूची निकलवाए गए तौ वह्मा नाम नाय बाय। येहिसे हमरे सब ज्ञापन दिये आय हई। शान्ती देवी, बदामा बताईन की कोटेदार कउनौ सुनवाई नाय करते। सूची मा नाम नाए चढ़ाईन।

राधिका बताईन कि पांच छह साल से रासन कार्ड बनेके ताई ऑनलाइन कराई थी लकिन कुछ पता नाय चलत फारम कंहा गए। कोइला बताईन की तीन साल होइगा हमार आदमी ख़तम होई गईन लकिन न रासन मिलै न पेंसन। गरीब मनई कै कौनो सुनवाई नाय बाय।

समाजसेवी हाजी मोहम्मद अकमल उर्फ़ जुगनू कहिन की बीस साल से जनता के ताई काम करत हई। कम्बल बितरण जेसेन तरह तरह कै सुबिधा जनता का देवाईथी। अब रासन कार्ड गरीबी पात्र मा शामिल करै के ताई शासन प्रशासन से मांग करत हई कि उनकै हक़ गरीबन का मिल जाय। येहि कै कोटेदार कार्ड धारकन का रासन नाय देतिन। ब़ार ब़ार लौटाय दियाथिन। शासन से अपील करब कि कोटेदारन का टाईट करै जेसे वै मनमानी न कै पावै।