जाल बिना ट्रान्सफारमर, करंट लागे को डर

हादसा को करत इन्तजार
हादसा को करत इन्तजार

महोबा शहर, राठ चुन्गी। एते बीसन साल को ट्रान्सफारमर धरो हे। जीखो जाल दो साल से टूटो परो हे। बिना जाल के ट्रान्सफारमर में कोनऊ भी बड़ी घटना होंय को डर हे। जींमे बिजली विभाग के कर्मचारी कोनऊ ध्यान नई देत हे।
कस्बा के सुधा ओर बिहारी बताउत हे कि एते दुकान होंय के कारन हजारन आदमी ओर बच्चा समान खरीदन आउत हे। साथे अन्ना जानवर बेटत हे ओर लड़न लगत हे। आदमी तो जानत हे पे जानवर ओर बच्चन खा बोहतई ध्यान देने परत हे। लगत हे कि कहूं धोखे से छू न लेय तो करंट फेल जाये। मूलचन्द्र ओर खेमचन्द्र ने कहो कि ट्रान्सफारमर को दो साल से जाल टूटो हे। बिजली विभाग के कर्मचारी एतई से आउत जात हे, पे पर्दा डारे रहत हे।
महोबा बिजली विभाग के जे.ई. एम.पी. सिंह ने बताओ कि मोये ऊखे जाल टूटे की जानकारी नइयां। अब मिली हे तो जल्दी ही जाल लगवा दओ जेहे।