जारी है डाकुओं का आतंक मानिकपुर ब्लॉक के खिचरी गाँव में फैला आतंक

जिला चित्रकूट, ब्लाक मानिकपुर, गांव खिचरी 6अगस्त के रात मा लगभग डेढ़ बजे प्रधान मुन्नी देवी के घर मा बदमाश आय अउर लोगन के साथै मारपीट करिन। मारपीट का कारन रहै कि बदमाश प्रधान के परिवार वालेन से दुइ लाख रुपिया के मांग करिन रहैं। रुपिया न दें मा प्रधान के देवर मुनुवा का उठा लइगें। यहिके रपट मानिकपुर थाना मा लिखाइगे,पै अबै तक बदमाशन का कउनौ पता लाग हवै।
गांव के चुन्नी लाल का कहब हवै कि रात मा डेढ़ बजे बदमाश आय अउर प्रधान का घर पूंछत रहैं। हम लोग सोवत रहेन। बदमाश हमका जगाइन अउर कहिन के प्रधान कहां रहत हवै। हमका वहिका घर बता देव। हम उनका घर नही बतायेन यहिसे खूबै मारिन हवैं। पता रहै कि उंई बदमाश हवै। हम लोगन के साथै मारपीट करिहैं। प्रधान के भतीजी रुबी का कहब हवै कि बदमाश घर आय अउर कुण्डी बजावत रहैं। हमार चाची आई अ उर दरवाजा खोल दिहिस हवै। बदमाश चाची का बइठा लिहिन। यहिके बाद दुइ हवाई फैर करिन अउर चाची से कहिन कि अगर अपने देवर के लाश लें का हवै तौ दुइ लाख रुपिया दें का परी तबहिने लाश मिली। प्रधान के भाई का कहब हवै कि हमका दुइ लोगन के ऊपर शक हवै।एक दयाराम अउर दूसर रामचंद्र अउर कुछ लोगन का नहीं पहिचान पाये हौं। या घटना से गांव के लोगन मा दहसत का माहौल बना हवै। काहे से कि बदमाश बेकसूर लोगन के साथै मारपीट करिन हवै।लोगन के बहुतै चोटै आई हवै। मुनुवा के औरत का कहब हवै कि का लोगन का पता रहै कि प्रधान का घर येत्ती रात के काहे का पूंछत हवैं। कुछ मड़ई प्रधान का घर नहीं बता पाइन। यहिसे उनका भी बंदूक के बट से खूबै मारिन। मानिकपुर थाना के मुंशी रामजी वन का कहब हवै कि रपट लिख लीन गे हवै। बदमाशन के खिलाफ़ दुइ लाख रुपिया के मांग,चोरी करब,मारपीट करब, जानमाल का खतरा के धारा लाग हवैं।
रिपोर्टर- मीरा जाटव और नाजनी रिजवी 
13/08/2016 को प्रकाशित

जारी है डाकुओं का आतंक
मानिकपुर ब्लॉक के खिचरी गाँव में फैला आतंक