जागो वोटर जागो! मतदान रैली की झलकियाँ महोबा और चित्रकूट जिले से #UPElection2017

जिला महोबा और चित्रकूट के चुनाव की तैयारी अब चरम पे हे। जिते उम्मीदवार हर पेतरा अपनाबे में लगे। कितऊ कितऊ सरकारी अधिकारी भी मतदाता को जागरूक करबे में कोनऊ कसर नइ छोडबो चाह रए चाहे फिर बो कोनऊ भी होबे।
महोबा जिला के कबरई का मार्च होबे, चाह महोबा जिला की बिक्रम रैली होबे या चित्रकूट जिला को मोमबत्ती मार्च। रामकरण ने बताई के जो नेता आहे फिर देखो जेहे लेकिन जो वादा कर के जात फिर बे कबहु नइ करवात जे हमाय साहू जी हे इनसे वादा भी करो तो के सड़क बनबा देहे लेकिन कछु नइ बनबाओ। और सब पढ़े लिखे सब अपनी अपनी सोच से नेता चुन हे। और जो अबे तक हते उन ने कछु नइ करो अब आगे देखो का हो रओ।
काय के वोट के टेम पे सबको ध्यान आत जनता की फिर सब भूल जात के जनता दुख में हे के सुख में फिर कोऊ नइ आत देखबे। और जो वादा कर जात सो न बे पूरे करबे आत।
मंगल सिंह ने बताई के पहले जो चुनाव भओ तो सो सब वादा करे ते के जो बनबाहे बो करवाहे लेकिन कछु नइ करबाओ।
हमाई इच्छा हे के पानी को साधन हो जाबे सड़क बन जाबे तो जे मोड़ी मोड़न को परेशानी नइ हुए स्कूल जाबे आबे में। जे मोड़ी आबे जाबे में परेशान होती बरसात में आठ आठ दिना स्कूल नइ जा पाती एसे होत कउ पढाई का फायदा हे एसी पढ़ाई को।
एस पी गौरव सिंह ने बताई के सब जघा पुलिस व्यवस्था मौजूद हे कोनऊ समस्या नइ हो रई। जइ से हम जो रूड मार्च कर रए के जेसे जो गांव हे जिनमे ज्यादा दबंग आदमी हे तो कोऊ से डरने नइया अपनी मर्जी से अपनों मतदान करो। हम एसे गांव और शहरन में जा रए के कोऊ को कोनऊ परेशानी न होबे। कालीकरण ने बताई के जागरूक रैली से हमे सौ प्रतिशत सफलता मिली सब आदमियन को जागरूक कर रए। और हमाई कोशिश हे के जितने भी विकलांग हे सब मतदान करे। विकलांग आदमियन को कबो हे के अगर हम चल फिर पाते तो हम भी रैली में जाते।
राम मूर्ति ने बताई के जो जा रैली हे बो विकलांग मतदाता के लाने हे। उन्हें उनकी पूरी तरा से भागीदारी हो पाबे। एक मजबूत लोकतंत्र बने। और जामे निर्वाचन आयोग की जा मनसा हे के अगर चलबे फिरबे में असमर्थ हे तो उन्हें सुविधा कराई जाबे। और उन्हें मतदान करबे के लाने लाइन में लगाबे की कोनऊ जरुरत नइया उन्हें पहले प्राथमिकता दइ जाबे। आयोग ने जो भोत अच्छो काम करो के हमाये जो विकलांग मतदाता हे बे अपनों मतदान नइ करत ते अब बे सब कर ले।
चित्रकूट के मोनिका रानी ने बताई के जो प्रोग्राम हो रओ बो मतदाता जागरूकता के लाने करो जा रओ। काय के सबको पतो हे के 23 फरवरी को मतदान होने।अक्सर कई जात के जो शहरी हे बे कम मतदान करत जइ के लाने जो रैली निकारी जा रई। और सब शहरी इकठ्ठे भये और मोमबत्ती जला के सूचित करबाओ के आज तक जिन ने मतदान नइ करो बे सब कर हे और अपने जीवन में उजाला कर हे।

रिपोर्टर- सुनीता और नाजनी

Published on Feb 1, 2017