कभी भी गिर सकती है बांदा जिले के प्राथमिक स्कूल की छत

जिला बांदा, ब्लाक तिंदवारी, गांव पथरा। 15 साल पहिले हेंया प्राइमरी विदयालय बनावा गा रहै पै या स्कूल के बिल्डिंग बिलकुल जर्जर हालत मा है बरसात मा स्कूल के छत से पानी चुवत है। जेहिसे बच्चन का बइ ठे  मा बहुतै परेशानी होत है स्कूल के मास्टर विभाग मा कइयौ दरकी दरखास दिहिन हैं, पै अबै तक कुछौ सुनवाई नहीं भे आये।
सुन्दर लाल निषाद का कहब है कि स्कूल के बिल्डिंग ज्यादा बारिश मा कत्तौ भी धंस सकत है काहे से बिल्डिंग सगले से जर्जर है। यहिसे बच्चा  अउर मास्टरन  का खतरा है। मुन्नी बताइस कि बच्चन का रोज स्कूल भेजित हैं, पै स्कूल का हालत देखे से डेर लागत है। संध्या बताइस कि स्कूल  मा मिटटी गिरत रहै यहिसे डेर लागत रहै यहै कारन अब मैं दूसर स्कूल मा पढ्त हौ पंचायत मित्र उमाशंकर देवेदी बताइस कि स्कूल बनावे मा घटिया सामान लगाइन है यहै कारन सगले पानी चुवत है।
हेडमास्टर परमेश्वरी  दयाल अहिरवार का कहब है कि डी.एम., खण्ड शिक्षा अधिकारी, बेसिक शिक्षा अधिकारी सगले लिखित दरखास दीने हौ पै अबै तक मरम्मत खातिर रुपिया नहीं आवा आय। खण्डशिक्षा अधिकारी आनन्द कुमार का कहब है कि स्कूल के बिंल्डिंग बिल्कुल सही है यहिके जांच कीन गे है। जंहा से पानी चुवत है वहिके मरम्मत खातिर हेडमास्टर से कहा गा है।

रिपोर्टर-गीता देवी

01/09/2017 को प्रकाशित