जमीन पीछे लई जान

जिला महोबा, ब्लाक कबरई, कस्बा श्रीनगर। एते के भैरव गंज मुहल्ले में मूलचन्द्र साहू ओर शंकर साहू के बीच में जमीन खां लेके लड़ाई भई। जीसे मूलचन्द्र साहू ने अपने भाई शंकर साहू खां गोली से जान से मार दओ हे। ऊखे साथे शंकर की ओरत राजकुमारी खें खोपड़ी में कुल्हाड़ी मार के फरार हे। जीसे ऊखी हालत खराब होय से महोबा सरकारी अस्पताल में भर्ती हे। राजकुमारी खें खोपड़ी मे ज्यादा घाव होने ओर ऊखे आदमी के मरे की खबर में ऊखे ऊपर बड़ा सदमा हे। जीसे ऊ ज्यादा नई बोल पाउत आय।
राजकुमारी कि बुआ के लड़का ब्रजमोहन ने बताओ कि ईखे ससुर दीनदयाल के नाम तीस बीघा जमीन हती। जोन पन्द्रह-पन्द्रह बीघा जमीन बांट दई हती। शंकर अपने डेढ़ बीघा में पुदीना के खेती करत हतो ओई खेत की सिंचाई खंा लेके लड़ाई भई हे। मूलचन्द्र 31 मार्च 2013 खे सबेरे 8 बजे अपने भाई शंकर साहू खें गोली मार दई हे। राजकुमारी बचाउन गई तो ऊखंे कुल्हाड़ी मार खें गांव से फरार हे। ईखी जांच श्रीनगर थाना पुलिस करत हे।
मूलचन्द्र की बिटिया प्रीती ने बताओ कि हमाए पापा छोट चाचा खा लड़ाई करत डेढ़ साल हो गये हे। अभे अनाज काटे वाली मशीन आई हती तो चाचा अपने खेत से नई निकरत देत हतो जीसे पापा ने चाचा खें गोली मार दई हे। पापा कुल्हाड़ी से बाबा दीनदयाल खंे मारत हतो तो चाची बचाउन आई हती जीसे कुल्हाड़ी चाची के लग गई हे।
श्रीनगर थाना के एस.ओ घनश्याम सचान ने बताओ कि धारा 302, ओर 307, के तहत मुकदमा लिखो गओ हे। अभे मूलचन्द्र फरार हे। ऊखे पकरे की पुलिस पूरी कोशिश करत हे।