जन संपर्क का अनोखा अंदाज़ मऊ मानिकपुर की कांग्रेस प्रत्याशी संपत पाल की बैठक में…

जिला चित्रकूट, ब्लाक मऊ अउर मानिकपुर गुलाबी गैंग के अध्यक्ष सम्पत या दरकी काँग्रेस पार्टी कइत से चुनाव लड़त हवैं। विधासभा चुनाव का प्रचार या समय आखरी चरण मा हवैं सम्पत पाल मड़इन से हाथ मिला के, गले मिल के, रिश्तेदारी बता के अउर गाना गा के चुनाव प्रचार मा लाग हवैं। भइया हो जाओ होशियार नेता बइठे है तैयार टाटा सोमो लाते है ए.सी में सोते है किसान जब रोते है नेता तब सोते है।
सम्पत पाल मड़इन से कहत हवै कि अबै मैं उम्मीदवार नहीं बनीं आहूं तुम्हार जइसे साधारण मड़ई बस आहूं। जबै मैं जीत जइहौं तौ काम कागजन बस मा न होइ। सरकारी काम गांव मा जके जांच कइके होइ। कागज बस मा सजा के न रखिहौं। तबहिने मोर मिशन सफल होइ। हर गांव मा प्रचार करै खातिर मेहरियन का ग्रुप बनावा गा हवैं।
सपा अउर काँग्रेस के गठबंधन के बारे मा सम्पत पाल कहत हवै कि राहुल गांधी अउर अखिलेश यादव जइसे नये युवा नेतन का भी मउका मिले का चाही।हर गांव मा पानी के समस्या ज्यादा हवैं।
नीकंतान रिबोर करा के हैण्डपम्प ठीक कराइहौं। जानवरन खातिर सरकारी गौशाला बनवइहौं। मड़ई मोहिसे आसानी से मिल सकत हवै बड़े-बड़े नेतन के लगे समय नहीं रहत आय।
भाजपा पार्टी के बारे मा सम्पत पाल कहत हवै कि नोटबंदी कइ के गरीब मड़इन का बैंक के लाइन मा खड़ा कइ दिहिन हवैं। भाजपा के उम्मीदवार आर.के.पटेल दल बदलू नेता आहीं। उंई तीन दरकी पार्टी बदलिन हवै।
पहिले बसपा मा फिर सपा मा अब भाजपा मा हवै। का जनता इनतान का दल-बदलू उम्मीदवार चुनी कि अपने क्षेत्र का उम्मीदवार चुनी, या तौ अबै वाला समय बतई।

रिपोर्ट- खबर लहरिया ब्यूरो

Published on Feb 21, 2017