छेड़खानी को आरोप, नई होत सुनवाई

Mahoba - Kotwaliमहोबा शहर, कोतवाली क्षेत्र के के सत्रह साल की लड़की को आरोप हे समाजवादी पार्टी के नेता जिला अध्यक्ष के लड़का ने मोेये साथे छेड़खानी करी हे। ईखी रिपोर्ट कोतवाली में लिखाई हे। पुलिस कारवाही के नाम पे कोनऊ ठोस कदम नईं उठाउत हे।
लड़की बताउत हे की में 22 अक्टूबर खा में मंदिर बड़ी चन्द्रिका मेला देखन गई हती। तभई जिला अध्यक्ष बाबू मंसूरी को लड़का सफीक अपने दोस्त इसरार के साथे आओ ओर मोये साथे छेड़खानी करन लगो। तभईं मे जोर से चिल्लानी तो दोनऊ जान से मारें की धमकी देके भाग गयें। जा बात मेंने अपने परिवार वालेन से बताई ओर कोतवाली में रिपोर्ट लिखाउन गये। पुलिस ने मौके में पोहोच दोनऊ खा पकर लओ, पे छोड़ दओ हतो। लड़की कहत हे की हम तो का गरीब हे चुप हो जेहे पे कछू दिनन में एई अधिकारिन के परिवार वालेन के साथ हो हे। लड़की के परिवार वाले कहत हें की सपा की सरकार हे ओर ओई के आदमी हे। जीसे पुलिस हमाई गरीबन की नई सुनत हे।
28 अक्टूबर खा पूर्व सासद गंगाचरन राजपूत पिडि़ता परिवार के घर गये ओर न्याय दिबायें को भरोसा दओ। साथई कहो की अगर अपराधियन खा जल्दी न पकर जेल भेजो जेहे तो आंदोलन करहें। महोबा कोतवाली को कोतवाल अब्दुल रज्जाक कहत हे की 354 छेड़खानी ओर पाक्सो एक्ट के तहत मुकदमा लिख गओ हे। ईमें सात साल से कम की सजा हे जीसे छोड़ दओ हे।