चेक न दें पे लेखपाल सस्पेन्ड

तहसील में करत हंगामा
तहसील में करत हंगामा

जिला महोबा, ब्लाक कबरई, गांव बिलखी। एते जनवरी-फरवरी 2014 में ओला वृष्टि के कारन फसल बरबाद हो गई हती। लेखपाल एक हजार रूपइया लेय के बाद देत हतो। जीखी दरखास गांव के किसानन ने 20 मई 2014 खा डी.एम. खा दई हे। जीसे डी.एम. ने लेखपाल खा निरस्त कर दओ हे।
गांव के मुन्ना, देवेन्द्र, लक्ष्मीराम, छुट्टन ओर भज्जू ने बताओ कि ओला वृष्टि के कारन हमाई पूरी फसल नुकसान हो गई हती। हम आपन परिवार खेती के सहारे पालत हते। महिपाल, मुलुवा ओर भूरा ने बताओ कि जभे ओला परे हते तो एस.डी.एम. मुआयना करन गए हते। अश्वासन भी दओ हतो कि मुआवजा मिलहे।
करन सिंह ओर गोकुल प्रसाद ने कहो कि हमाई चेक बनके आ गई हें, पे लेखपाल भवानीदीन चेक नई देत हे, कहत हे कि पहले एक हजार रूपइया देओ तभई चेक मिलहे। हम गरीब आदमी एक-एक हजार रूपइया किते से लाहे।
प्रधान केदार सिंह राजपूत ने कहो कि मोए गांव मे ंलगभग 9 सौ हेक्टेयर जमीन हे। जीमे ओलावृष्टि से 90 प्रतिशत फसल में नुकसान भओ हतो। लेखपाल चेक न देय से मेने कानूनगो मिथलेश कुमार से कहो हतो, पे कोनऊ सुनवाई नई भई। एई से हमने 20 मई 2014 खा तहसील दिवस मे डी.एम. खा दरखास दई हे। डी.एम. अनुज कुमार झा ने ई बात खा गम्भीरता से लई हे ओर आदमियन के बयान लेके लेखपाल खा सस्पेन्ड करे को आदेश दओ हे।
एस.डी.एम. सत्यप्रकाश राय ने कहो कि ओला वृष्टि को मुआवजा सरकार केती से किसानन खा न के बराबर आओ हे। ऊमें भी लेखपाल रूपइया मांगत हतो। एई से लेखपाल भवानीदीन खा सस्पेन्ड कर दओ हे।