चित्रकूट जिले में बीबी को मायके भेज, शौहर ने की दूसरी शादी

चित्रकूट जिला के ब्लाक रामनगर के गांव बाँधी मा सहर बानो नाम के मेहरिया का बिना बताये मनसवा इरशद होइने दूसर शादी कइ लिहिस हवै। सहर बानो ससुरे वालेन के ऊपर मारपीट का आरोप लगावत हवै।
लड़की का चाचा मोतीलाल का कहब हवै कि लगभग दुई साल होइगे हवैं। कारन यहै हवै कि वा दूसर मेहरिया कइ लिहिस हवै, यहै से नहीं राखत आय। अपना विकलांग हवै तौ वा मेहरिया कमा के खवावत हवै। ससुर कहत रहै कि जा चली जा वा दूसर कइ लिहिस हवै तौ तहूं दूसर कइले। मारपीट करत रहै अउर खाना नहीं देत रहे आय।
सहर बानो का कहब हवै कि पहिले मोहिका तीन चार महिना चाहत रहै फेर बस वहिनतान रहै। अबै वा मोहिका काहे चाहे जबै व दूसर मेहरिया राखे हवै। या बात का अपना नहीं बताइस वहिके बाप महतारी से पता चला हवै कि दूसर मेहरिया राख लिहिस हवै। काम बस लेत हवै खाना वहिनतान। खाना, पइसा, अउर खर्ज खराबा सब मोरे मइके से मिलै तबै खुश रहिहैं। काम करै गाली-गलौज ऊपर से सहै। सब मोर मइके से मांगत हवै तौ मोर महतारी राड़ मेहरिया आय वा कहाँ से पाई भाईन का देखी उनके लड़का बच्चन का देखी, केही-केही देखी अउर केही केही खवाई।
लड़की कि मा सिलोचन का कहब हवै कि पता नहीं कि का भा हवै अबै तक तौ लड़की सबके मन का करत रही हवै, अबै अचानक पता नहीं की काहे एतना घृणा करत हवै। जबै लड़की के कुछ गलती नहीं आय तौ तुम काहे खफा हौ। सास, देवरानी, अउर ननद तीनों जने लपटी रही हवै तबै मोर लड़का अउर मोर भतीजा गे हवै तौ पूछीन की काहे मारत हौ तौ दामाद का एक थप्पड़ मोर लड़का मार दिहिस। तौ बाप महतारी लड़े लाग हवैं। तबै लड़का कहिस की जबै लड़की के गलती नहीं आय तौ वहिका कहे मारत हौ।
लड़की के सास हमीदा का कहब हवै कि हमै जउन सोचै का रहै हम व सोच चुके हन। अब हमै लगे कउनौ गुंजाईस नहीं आय चाहे वा तलाक लईले अउर चाहे मुकदमा दायर कइदे हमरे कइती से हर चीज मा दसखत हवैं।
सी.ओ.राजापुर, सुरेश शर्मा का कहब हवै कि अबै मोर संज्ञान मा या मामला आवा नहीं आय यहिके बारे मा पता लगाऊँ कि का भा हवै अउर का कीन गा हवै। तबही स्पष्ट बता सकत हौं।

रिपोर्टर- सहोद्रा

Uploaded on Apr 23, 2018