चित्रकूट जिले में धान को लेकर परेशान किसान

जिला चित्रकूट, गल्ला मंडी हिंया आस पास के गांव के मड़ई आपन धान के फसल ट्रैक्टर मा लादे तीन दिना से खड़े हवैं। काहे से गल्ला के सरकारी दुकान मा धान नहीं खरीदी जात आये। दुकानदार कहत हवै कि गोदाम खाली नहीं आय तौ का करी।
बरवारा गांव का रंजीत सिंह का कहब हवै कि हमै धान बेचें खातिर बोलावा गा हवै अब हमार धान नहीं खरीदत आहीं। तीन दिना से हम हिंया रहै का मजबूर हवैं। पै हमार नम्बर नहीं आवत हवैं।
मड़इयन गांव के जय किशोर का कहब हवै कि धान का सरकारी दाम 1470 रुपिया कुन्तल हवै। दुकानन मा 1000 रुपिया कुन्तल लेत हवैं। हमैं नही धान बेंचे का फायदा मिलत नही आय यहै कारन हिंया आये रहै।
पचोखर के बच्चूराम का कहब हवै कि मोर छह ट्रैक्टर धान से लदे खड़े हवै पै अबै बेंचे का नम्बर नहीं आवा आय। किसानन से सरकार वादा तौ बहुत करत हवै, पै किसानन का खून चूसा जात हवैं ।
रायपुरवा के माताबदर अउर कमला बदर का कहब हवै कि चार दिना से तौउल खातिर खड़े हवै हमार लगभग 24 कुन्तल धान हवैं। पै एकौ नही तौला गा आय दुकानदार कहत हवै गोदाम खाली नही आय तौ धान तौल के कहां रखबै। हिंया रहै से खाय पिये मा बहुतै परेशानी होत हवै, इनतान के ठंडी मा बड़े मुश्किल से रात कटत हवैं।
डी.एम. मोनिका रानी या समस्या का जल्दी खतम करै का वादा करिन हवैं। पै कबै तक या पता नहीं आय।

रिपोर्टर- नाजनी रिजवी

16/01/2017 को प्रकाशित