चित्रकूट जिले के रामनगर में एक और दुर्घटना, तीन की मौत चार घायल

जिला चित्रकूट, ब्लाक रामनगर, कस्बा रामनगर 21 मार्च का बोलरो के टक्कर से एक्सीडेंट होइ गा हवैं। जेहिमा दुइ मेंहरिया समेत एक महीना के बिटिया के जान चली गे हवैं।अउर चार मड़ई बहुतै ज्यादा घायल होइ गे हवै। पुलिस गाड़ी अउर ड्राइवर का आपन कब्जा मा लइके मुकदमा दर्ज कइ लिहिन हवैं।
रामरतन गुप्ता का कहब हवै कि सास बहु अउर नातिन बसिला गांव से बैंक सूखा राहत का रुपिया निकालें आई रहै। तबै चार पहिया के बोलरो एक खम्भा से टकरा के मेहरियन का कुचल डारिस हवै। घायल लड़का के महतारी गुलबिया बताइस कि कर्वी से एक गाड़ी आयी हवै जेहिसे टक्कर से मोर लड़का अउर एक मेहरिया घायल होइ गे हवै।
घायल राजेश कुमार बताइस कि मैं बोड़ी पोखरी से आपन घर रामनगर आवत रहेव तबै एक्सीडेंट होइगा हवै। गाड़ी पीछे से ठोकर मारिस हवै। घायल अखिलेश कुमार बताइस कि मैं डिब्बा मा बइठ रहेंव तबै बोलरो जोर से टक्कर मारिस तौ बेहोश होइ गये रहेंव। मोर हाथ अउर कमर मा चोट लाग हवै।
दरोगा मनोज कुमार शुक्ला का कहब हवै कि कर्वी से बोलरो तेजी से आई हवै पहिले बाइक वालेन का टक्कर मारिस हवै बाद मा मेहरियन के ऊपर चढ़ा दिहिस हवै। जेहिसे उनकर मउत होइगे हवै। मुकदमा दर्ज होइ गा हवै, कारवाही होत हवै।
17 मार्च का यहिनतान राजापुर कस्बा मा भी 18 साल के प्रभात के एक्सीडेंट मा जान चली गे हवैं। अउर वहिकर साथी प्रेम नारायण बहुतै ज्यादा घायल हवैं। पहाड़ी पुलिस का कहब हवै कि मुकदमा दर्ज होइ गा हवै।
फूलचन्द्र अउर शिवपूजन केसरवानी का कहब हवै कि प्रभात टैक्स जमा करे गा रहै। जबै पहाड़ी से राजापुर आवत रहै तौ वहिके बाइक के आगे बच्चा आ गा रहै। पीछे से तेजी से दारू पिये ट्रक वाला आवा अउर प्रभात का कुचल डारिस हवै। एक वहै लड़का आपन परिवार का खर्चा चलावत रहै। परिवार वालेन का हालत ख़राब हवै।

रिपोर्टर- सहोद्रा

 

24/03/2017 को प्रकाशित