चित्रकूट जिले के रामनगर कस्बे में लगा का गन्दगी का ढेर…

जिला चित्रकूट, ब्लाक रामनगर कस्बा राजापुर हिंया के मड़ई घरन का कूड़ा रास्ता मा फेक देत हवैं जेहिसे सगले गंदगी फइलत रहत हवैं। नगर पालिका के करमचारी नींकतान से सफाई नहीं करत हवैं।
दुकानदार ओमप्रकाश का कहब हवै कि रास्ता मा कूड़ा पड़ा रहत हवैं। चेयरमैन से कहित हन तौ उंई कहत हवै सफाई करा दीन जई। पै या कूड़ा हिंया यहिनतान पड़ा रहत हवैं।
शिव कुमार कहत हवै कि डाक्टर के दुकान का कूड़ा अउर घरन का कूड़ा सब हिंया फेंका जात हवैं। जेहिसे कुत्ता खा के हियां हुंवा फइलावत हवै। कूड़ा के कारन बहुतै मच्छर लागत हवैं। नगर पालिका वाले धुंआ उड़ावत हवैं पै मच्छर नहीं मरत आहीं। सोनू सोनकर बताइस कि मड़इन का गंदगीके ढेर से निकले का पड़त हवैं। पूजा करै खातिर मेहरियन का भी गन्दगी से निकल के जाये का पड़त हवैं। सफाई करै वाले बड़ा बड़ा झाडू लगा के सफाई कइ देत हवैं।नीकतान सफाई नहीं करत आही।
चेयरमैन लक्ष्मी प्रसाद वर्मा का कहब हवै कि कूड़ा डाले खातिर सरकारी बाल्टी आयी रहै वहिका मड़ई अपने-अपने घर मा रख लीन हवैं। रास्ता का कूड़ा फेंकत हवैं। कूड़ा इकट्ठा कइके गाड़ी से बाहर फेंकवा दीन जात हवै।

रिपोर्टर- सहोद्रा

02/11/2016 को प्रकाशित