चित्रकूट जिले के राजापुर क़स्बा में पिछले पांच साल से टूटी है पुलिया

जिला चित्रकूट, ब्लाक, रामनगर, गांव अमवा राजापुर से मानिकपुर जाये वाली रास्ता के पुलिया पांच साल से टूट पड़ी हवैं। जेहिमा अबै तक कइयौ घटना घट चुकी हवै। पै पी डब्लू डी विभाग कउनौ ध्यान नहीं देत आहीं।
संतोष अउर योगेन्द्र सिंह टूट पुलिया के बारे मा बतावत हवैं कि पुलिया टूटे से साधन निकले मा बहुतै परेशानी होत हवैं। घुमावदार रास्ता मा मोड़ हवैं। ब्रेकर भी नही बना आय। बड़ी बड़ी घटना तौ नही होर पै छोट छोट घटना आये दिन होत रहत हवैं।
राजापुर से इलाहाबाद तक जाये वाले हिया से बहुतै साधन निकलत हवै या रास्ता बहुत चलत हवैं।
बद्री प्रसाद अउर सुरेन्द्र कुमार बताइन कि 30 साल पहिले या पुलिया बनी रहै अब पांच साल से टूट पड़ी हवैं। दरखास दे के बाद पी डब्लू डी विभाग नीचे से रपटा बस बनवा दिहिन हवैं। या कारन साधन अब नीचे से निकलत हवैं।
बालू से भरा ट्रक जबै निकलत रहै तबहिने पुलिया टूट गे रहै। पुलिया येत्ती ज्यादा टूट हवै कि हुंवा से कउनौ निकल नही सकत।
पी डब्लू डी विभाग के ए सहायक सेवादास का कहब हवै कि रपटा बनवा दीन गा रहै। बाईपास रास्ता चालू हवै। सरकार कइत से जइसन रुपिया आई तौ पुलिया बनवा दीन जई।

रिपोर्टर- सहोद्रा 

27/09/2016 को प्रकाशित