चित्रकूट जिले के मानिकपुर ब्लॉक के लोगों को खराब सड़क के कारण होती है परेशानी

जिला चित्रकूट के रामनगर ब्लाक के बांधी गांव के सड़क अउर पुलिया सालन से खराब पड़ी हवै। जेहिके कारन मड़इन का आवें जायें मा बहुतै समस्या का सामना करे का पड़त हवै। दबंगन के कारन प्रधान रास्ता अउर पुलिया नहीं बनवा पावत आय। खण्ड विकास अधिकारी शेर बहादुर का कहब हवै कि कउनौ दबंग सरकारी रास्ता अउर पुलिया बने का नहीं रोक सकत आहीं। प्रधान शिकायत करी तौ पुलिस के मदद से रास्ता अउर पुलिया बनाई जइहैं।
सुनीता का कहब है कि हिंया के पुलिया ख़राब पड़ी हवै तौ निकले मा बहुतै परेशानी होत हवै रास्ता मा पानी अउर कचड़ा पड़ा रहत हवै यहै कारन मड़ई घूम के दूसर रास्ता से जात हवैं गोलरी बताइस कि ख़राब रास्ता होय कारन मड़ई अउर जानवर हिंया से निकले मा फंस जात हवैं यहै कारन मड़ई किनारे-किनारे जहां कांटा लाग हवैं हुंवा से निकलत हवैं। प्रधान, सेक्रेटरी, लेखपाल सबै से कहे हन। पै कोउ नहीं सुनत आय।
गुलाब बताइस कि बरसात मा सड़क मा पानी भरे से सगले कीचड़ होइ जात हवै।
ट्रक अउर ट्रैक्टर निकले से सगले खोद जात हवै। यहै कारन सड़क का मजबूत बनावें का चाही। प्रधान अमित कुमार का कहब हवै कि 2005 मा सड़क बनी रहै। पुलिया दुई साल से टूट पड़ी हवै।दबंग पुलिया का पूर दिहिन हवैं जेहिसे पानी नहीं निकलत आय। दबंगन के कारन कउनौ काम नहीं होइ पावत आय।
रिपोर्टर-राधा

Published on Dec 7, 2017