चित्रकूट जिले के पथरामनी गाँव में पीने की पानी की किल्लत #worldwaterday #savewater

जिला चित्रकूट, ब्लाक पहाड़ी, गांव पथरामानी के मड़ई नदी के पानी पिये का मजबूर हवै। पानी के समस्या खतम करै खातिर गांव के मड़ई चुनाव बहिष्कार भी करिन रहै पै डी.एम.के भरोसा दे के बाद वोट दिहिन हवैं पै एक महीना होय के बाद भी पानी के समस्या से मड़ई जूझत हवैं।
गौशरण बताइस कि हमार गांव मा पानी के बहुतै समस्या हवैं मड़ई नदी से पानी लावत हवैं। फूलमतिया बताइस कि चोहड़ा से कटोरी–कटोरी पानी निकाल के भरित हन तबै पिये का खातिर होत हवै। जबै से हम या गांव मा आये हन तौ यहै समस्या हवैं।
गीता अउर सिलिया देवी का कहब हवै कि पानी के समस्या के कारन गांव के लड़कन के शादी नहीं होत आय।
नोनार गांव के कुंआ से पूर गांव के मड़ई पानी लावत हवै। चोहड से पानी भरे मा दिन भर लागत रहै। खरा पानी पिये से जानवर के अउर मड़इन के तबियत ख़राब होइ जात है। पानी भी नहीं नीक लागत आय।
इच्छा राम यादव का कहब हवै कि हमार गांव मा 10 हैण्डपम्प हवै जेहिमा से 5 हैण्डपम्प दुइ साल से खराब पड़े हवैं। 10 फुट का चोहडा खोद के मड़ई वहिमा से पानी लावत हवै.एक महीना का चोहडा सूख जात हवै तौ नोनार अउर लोहदा गांव से साइकिल अउर बैलगाड़ी से पानी लाइत हन।
23 फरवरी का 12 बजे तक चुनाव वहिष्कार करे हन जबै डी.एम पानी के समस्या खतम करै खातिर ट्यूबवेल अउर पाइप लाइन के व्यवस्था करे का कहिन रहै। पै अबै तक कुछौ समस्या खतम नहीं भे आय विधायक अउर सांसद कउनौ नहीं सुनत आहीं।
विधायक प्रतिनिधि सुशील द्विवेदी का कहब हवै कि पहाड़ी बी.डी .ओ से बात होइ गे हवै।जउन हैण्डपम्प ख़राब हवै जल्दी ठीक कराये जइहैं।

रिपोर्टर- सहोद्रा और सुनीता

22/03/2017 को प्रकाशित