विकलांग विश्वविद्यालय में बना चित्रकूट मतदाता जागरूकता रैल्ली का जोशीला गाना #UPElection2017

जिला चित्रकूट, बेड़ीपुलिया लोकतंत्र के या दुनिया मा मतदाता का भगवान माना गा है। उत्तर प्रदेश के चुनावी महौल मा मतदाता का जागरूक करै खातिर विकलांग बच्चा अउर मास्टर गाना बनाइन हवैं। जगतगुरु रामभद्राचार्य विकलांग विश्वविद्यालय मा इं बच्चा पढ़त हवैं। या गाना बनाइन हवैं। जागो देश के मतदाता अब हम विनती करत हन। धर्म जाति से ऊपर उठकर चलो चले मतदान करैं।
संगीत मास्टर बी.एन मिश्रा का कहब हवै कि कुछ बच्चा कहत रहै कि हम वोट डाले न जइबे यहै कारन हम या गाना बनाये हन। या गाना हम 26 जनवरी मा गावें खातिर भजन जइसे बनाये हन। उत्तर प्रदेश के चुनाव आयोग या गाना का मतदान का जागरूक करै खातिर चयन कइ लिहिन हवैं। यहै कारन अब हम या गाना मतदान जागरूक रैली गावा जात हवै।
कुलपति वी.सी.दुबे का कहब हवै कि चुनाव आयोग गाना सुन के मतदाता जागरूक करै खातिर कहत हवै। यहै खातिर उंई या गाना के कइयौ सी.डी बनावै का कहिन हवैं हमीरपुर का विकलांग लड़का शिवम कुमार या विश्वविधालय मा पढ़े आवा हवै। शिवम कुमार कमर के नीचे से विकलांग हवै।
शिवम का कहब हवै कि हिंया मैं बी.ए के पढ़ाई खातिर आये हौं जबै मोहिका पता चला कि हिंया संगीत सिखावा जात हवै तौ मैं आपन विषय बदल दीने हौं अउर संगीत सिखत हौं।
सतना के एस कुशवाहा चुनाव आयोग का संदेश देत हवै अउर कहत हवै कि मोहिका आंखिन से नहीं देखात आय। पै मैं चाहत हौ कि चुनाव आयोग उत्तर प्रदेश समेत पूर भारत अउर पहाड़ी इलाकन मा मतदातन का भी जागरूक करै।मऊ का रहै वाला के के.सी पटेल विश्वविद्यालय के 16 सौ छात्रन मा एक आय। वा कहत हवै कि या गाना से वोट का प्रतिशत बढ़ जई।

रिपोर्टर- सुनीता

15/02/2017 को प्रकाशित