चित्रकूट जिले के कालूपुर पाही गॉव

जिला चित्रकूट, ब्लाक कर्वी, गांव कालूपुर पाही 25 नवम्बर का हिंया शौचालय बना खातिर नोटिस आयी हवैं। 15 दिन मा शौचालय न बने मा मड़इन का 12 हजार का जुर्माना अउर सबै सरकारी सुविधा छीने का कहा गा हवैं।तबै मड़ई एस,डी,एम का दरखास दिहिन हवैं।
श्री कृष्णा का कहब हवै कि 2015 मा पैंसठ शौचालय आये रहैं, तबै हमहूं शौचालय बनावै खातिर फारम भरे रहेन। हमरे खाता मा रुपिया नहीं आवा पै शौचालय बनावै खातिर नोटिस आ गा हवैं। हमरे पासबुक मा एंट्री करा के देख सकत हवै कि हमरे लगे शौचालय का रुपिया नही आवा। सरकारी शौचालय बनवइयै जबै हमें रुपिया मिली। अबै तौ हमरे बच्चन के खाय तक का नही आय तौ हम शौचालय कहा से बनवइयै।
प्रधान चुनाव हार गये हवै यहै कारन शौचालय नहीं बनवाइन आय जबै हमरे लगे नोटिस आवा तौ हम एस, डी, एम का दरखास दीने हन।
पूर्व प्रधान राजा भैया का कहब हवै कि मोरे कार्य काल मा पैंसठ शौचालय आये रहैं। जेहिमा से तीस शौचालय बनवा दीने हौ। सप्लायर से ईंटा,बालू अउर सीमेंट सबै मटेरियल मडइन के घर पहुंचा दीने हौ। जेहिमा से कुछ मडई शौचालय बनवा लिहिन रहै। अउर कुछ कहत रहै हमार मटेरियल चोरी होइगा तौ यहिमा हमार का गलती हवै।

रिपोर्टर- नाजनी रिजवी

03/12/2016 को प्रकाशित