चित्रकूट जिले के अमवा गावं में गोबर डालने को ले दो पक्षों में हुई मारपीट , प्राथमिकी दर्ज

जिला चित्रकूट, ब्लाक रामनगर, क़स्बा राजापुर खाद खोदे के बात का लइ के 23 सितम्बर का दुइ पक्षन मा मारपीट होइगे हवैं। मारपीट चाचा भतीजा के बीच भे हवै। राजापुर थाना मा रपट होइगे हवै। मारपीट का कारन जाने खातिर जांच चलत हवै।
भतीजा राजकुमार मारपीट के बारे मा बतावत हवै कि हमार खाद पड़ी रहैं वहिका हम खनत रहै तबै हमार चाचा धर्मनारायण मना करिस हिंया गढ्ढा न करौ। न हिंया भंइस बंधत रहेवं। जबै हम नहीं मानेन तबै उंई हमैं गाली दे लाग।
डंडा अउर कुल्हाडी लइ के मारपीट करै लाग। मारपीट मा बाप बहिनी समेत पांच मड़ई के सर मा चोट लाग हवै। मारपीट के रपट कइ दीने हन।
चाचा धर्मनारायण का कहब हवै कि हम आपन बांस काटत रहेन । तबै मैं मना कीनेव कि किनारे से खाद खोद लेव । तबै उई लाठी अउर कुल्हाडी लइ के मारपीट करै लाग। जेहिमा मोर हाथ टूट गा अउर सर मा चोट लाग हवै। मोरे लड़का राजेश के पीठ मा चोटलाग हवै। रपट करावै के बाद दरोगा जांच करे आये रहै।
राजापुर दरोगा शैल कुमार का कहब हवै कि दूनौ पक्षन के रपट लिख लीन गे हवै। जांच चलत हवै। समझउता करावै के कोशिश कीन जात हवै।

रिपोर्टर- सहोद्रा

28/09/2016 को प्रकाशित