चित्रकूट जिले के पौव्वा के घर में डाकुओं ने बोला धावा

जिला चित्रकूट, ब्लाक मानिकपुर, गांव मदना 21 अप्रैल का पौव्वा के घर मा डाकू धावा बोल दिहिन हवैं।डाकू पौव्वा के लड़की का बांध के मारिन हवै अउर घर का सामान लइगें हवैं।पुलिस कहत हवै कि डकैती के रपट लिख लीन हवै।
पौव्वा का कहब हवै कि हम भूसा ले चले गये रहेन तबै डाकू आये हवै।लड़की घर मा अकेले रहि हवै तौ डाकू वहिका धमकी देत रहै कि तोर बाप, महतारी अउर भाई का जान से मार डरबै।
पौव्वा के मेहरिया पतिया बताइस कि डाकू हमार सब गहना बिछुवा, सुतिया, माला अउर नरदली सब लइगें हवै। हमार कउनौ से दुश्मनी नहीं रहि आय थोड़ी बहुत लड़ाई झगडा तौ गांव मा होत रहत है। पौव्वा के लड़की रानी बताइस कि डाकू मोर मुंह बांध के मोहिका बंदूक के कुंदा से मारिन हवै अउर गाली भी देत रहै डाकू पुरान दुश्मनी के बात करत रहै पै हमार कउनौ से कुछौ दुश्मनी नहीं आय। जबै हमार घर मा डाकू घुस रहै तबै कउनौ गांव वाले हमें बचावे नहीं आय तबै हम 100 नम्बर पुलिस का फोन करे हन तौ पुलिस आयी हवै अउर जांच करिन हवै।
प्रभारी निरीक्षक मनोज कुमार शुक्ला का कहब हवै कि डकैती का मुकदमा लिख लीन गा हवै। डाकुन के पहिचान कीन जात हवै।पीड़ित परिवार का नियाव मिली कि न मिली पुलिस अपराधिन का पकड़े मा फुर्ती देखाई कि न देखाई या तौ आवे वाला समय बतई सरकार गुंडागर्दी खतम करै के बात तौ करत हवै।

रिपोर्टर- सहोद्रा

26/04/2017 को प्रकाशित