चित्रकूट के हरिजन पुरवा प्राथमिक विद्यालय में ना मिड डे मील ना किताबें

जिला चित्रकूट, ब्लाक राम नगर, गांव हरिजन पुरवा हिंया के प्राथमिक विद्यालय मा बच्चन का मिडडे मील नहीं मिलत।परीक्षा का समय आवै वाला हवै, पै बच्चन का अबै तक किताब नहीं मिली आहीं। बेसिक शिक्षा अधिकारी आनन्द कुमार का स्कूल के या समस्या के कउनौ जानकारी नहीं आय।
स्कूल मा खाना बनावै वाली गोमती बतावत हवै कि मास्टर स्कूल आवत रहै। मड़ई शिकायत कइ दिहिन हवै तौ उनका हटा दीन गा हवैं। खाना बनावै का चार्ज कउनौ का नहीं दीन गा आय यहै कारन खाना नहीं बनत आय। बच्चन के महतारी रन्नो का कहब हवै कि तीन महीना से स्कूल मा कोउ नहीं आय।लड़का स्कूल जात हवैं तौ गुल्ली डंडा खेलत हवै। कउनौ पढ़ाई नहीं होत आय।
मास्टर दिलीप कुमार विश्वकर्मा का कहब हवै कि स्कूल मा पहिले शिव प्रसाद पटेल अउर अरविन्द पाल पढ़ावत रहै पै अब हटा दीन गें हवैं। स्कूल मा 57 बच्चा हवैं। कत्तो बीस कत्तो तीस बच्चा स्कूल आवत हवैं।तीन महीना से स्कूल बंद पड़ा रहै अब खुला हवै। जउन पुरान किताब रहि हवैं बच्चन का दइ दीने हौं।
हिंया खाना बनावै के व्यवस्था भी नहीं आय। स्कूल का शौचालय भी टूट फूट पड़ा हवै। कइयौ समस्या के कारन हिंया बच्चा पढ़े नही आवत हवैं।

रिपोर्टर- नाजनी रिजवी और सहोद्रा

Published on Feb 8, 2017