चित्रकूट के राजापुर बस अड्डे पर शौचालय ना होने से महिलाएं परेशान

जिला चित्रकूट, ब्लाक रामनगर, कस्बा राजापुर बसअ ड्डा हिंया दुकानदार अउर यात्री का शौचालय न होय से बहुतै परेशानी होत हवै। खासकर मेहरियन का तौ बहुतै ज्यादा दिक्कत होत हवै। नगर पंचायत जल्दी से जल्दी शौचालय बनावै का कहिन हवैं।
रानी का कहब हवै कि बाजार मा कुछौ न कुछौ काम रोज रहत हवै। पै हिंया शौचालय न होय के कारन बहुतै परेशानी होत हवैं। मनसवा तौ हिंया हुंवा चले जात हवैं पै महेरिया कहां जाये सगले मड़ई रहत हवैं। पेशाब के कारन पेट फूले लागत हवै।
ड्राइवर कृष्ण कुमार दिवेदी अउर छोटेलाल का कहब हवै कि शौचालय न होय के कारन मड़ई तुलसी स्मारक के भीतर पेशाब करै जात हवै। जेहिसे धार्मिक स्थल मा गन्दगी फइलत हवैं।
दुकानदार मिस्टर दिवेदी बताइस कि जबै यात्री पूछत है शौचालय कहां हवै, तौ का बतई, हिंया तौ शौचालय नहीं बना आय। टाउन एरिया वाले शौचालय नहीं बनवावत आहीं सगले सरकारी जमीन पड़ी हवैं।
वार्ड मेम्बर जयप्रकाश बताइस कि अबै जउन नवा नाला बना हवैं वहिके ऊपर शौचालय बनाये जइ हैं । चेयरमैन लक्ष्मी प्रसाद वर्मा का कहब हवै कि तुलसी स्मारक के अगल-बगल आठ-दस शौचालय बनवा दीन जइहैं।

रिपोर्टर- सहोद्रा

Published on Jan 23, 2017