चित्रकूट के मऊ में सड़क काम शुरू: खबर का असर

जिला चित्रकूट, ब्लाक मऊ, गांव बरगढ़ तीन साल से 7 किलोमीटर सड़क खराब पड़ी रहै। जेहिके खबर लहरिया अख़बार के अंक 89 मा छपी रहै। यहै कारन या सड़क 12 नवम्बर से बनब शुरु होइगे हवैं।
मुंशी योगेन्द्र मिश्रा का कहब हवै कि सड़क बनब शुरु होइ गे हवैं। केत्ता बजट आवा हवै या तौ नहीं पता आय।ठेकेदार जयप्रकाश पाण्डेय का सड़क बनावै का ठेका दीन गा हवैं। सड़क 15 दिसम्बर तक बन के तैयार होइ जई।
टैम्पो चलावै वाला विनय शुक्ला अउर रामअवतार बताइन कि सड़क बनै से टैम्पो चलावै वाले अउर पैदल निकले वाले मड़इन का बहुतै आराम होइ गा हवैं। पहिले तौ हमार टैम्पो मा सवारी बइठै डेरात रहैं। रास्ता बने से अब आराम से सवारी बइठिहैं उनका डेर न लागी। पहिले महीना मा टायर खराब होइ जात रहै अब कम से कम छह महीना चलिहैं।
पान के दुकान वाला राज बहादुर का कहब हवैं कि जउन सड़क मा गड्ढा होइ जात रहै। वहिका दुइ दरकी चंदा कइके बनवावा हवैं। अब सड़क बन जई तौ। सबहिन का सुविधा होइ। पी डब्लू डी सहायक अभियन्ता सेवादास का कहब हवै कि 12 नवम्बर से सड़क बनै का काम शुरु होइगा हवैं।
रिपोर्टर- सुनीता देवी