चित्रकूट के दलित बस्ती में पीने के पानी के लिए मुख्यमंत्री के 47 करोड़ के पैकेज का इंतजार

जिला चित्रकूट, ब्लाक पहाड़ी, कस्बा पहाड़ी हिंया के दलित बस्ती मा दुइ हैण्डपम्प लाग हवैं। उंई हैण्डपम्प भी खराब हवैं मुख्यमंत्री योगी आदित्यनाथ पीये के पानी खातिर 47 करोड़ का पैकेज दे के घोषणा करिन हवै।
गांव के मड़इन का मुख्यमंत्री के या पैकेज का इंतजार हवैं। चम्पा देवी अउर मंजू का कहब हवै कि हमार गांव का हैण्डपम्प एक साल से ख़राब पड़ा हवै प्रधान नहीं सुनत आय। नहाये अउर पकड़ा धोवे खातिर तालाब जाये का पड़त हवै। जानवर के पिये खातिर पानी भी ताला से लावे का पड़त हवै। तालाब हिंया से एक किलोमीटर के दूरी मा हवै। जउन हैण्डपम्प चलत हवै हुंवा से दुपाहरी के पिये खातिर पानी लाइत हन।
हीरामनी का कहब हवै कि हम जब से हिंया आये हन तब से पिये के पानी खातिर समस्या हवै ।दुइ किलोमीटर दूरी से पानी लावे का पड़त हवै। राजा बताइस कि आपन खुद का हैण्डपम्प लगवाये हन। हिंया से रोज शाम सुबेरे 50 मड़ई पानी भरे आवत हवै। दलित बस्ती मा पानी के व्यवस्था नहीं आय। नत्थू प्रसाद बताइस कि डी .एम का कइयौ दरकी आपन पानी के समस्या सुनाइत हन। उंई बी.डी.ओ का पानी के समस्या खतम करै का कहत हवै तौ बी.डी.ओ कहि देत हवै जबै योजना अइहैं तबै पानी के समस्या दूर होइ।
पहाड़ी ग्राम विकास अधिकारी जयकरन सिंह का कहब हवै कि जल निगम से हैण्डपम्प के रिबोर के लाने कहा जई। थोड़ी बहुत हैण्डपम्प ख़राब होइ हैं तौ मरमत करवा दीन जई। अउर गांव मा पानी के टैंकर के व्यवस्था कीनगें हवै।

रिपोर्टर- सहोद्रा

Published on Apr 4, 2017