चार सौ रूपिया का लाभ नहीं मिलै

जिला चित्रकूट, ब्लाक पहाड़ी, गांव बछरन, पुरवा गोसाईपुर। हिंया के सैकड़न मड़ई रानी लक्ष्मीबाई योजना के पात्र हवैं, पै आज तक उनका रानी लक्ष्मीबाई योजना का लाभ नहीं मिलत हवै। मड़ई लाभ लें खातिर प्रधान के एगसिया के चक्कर लगावत हवैं। यहिके खातिर कइयौ दरकी प्रधान से कहा गा ,पै नहीं सुनत हवै।
पुरवा के विद्या, रामबाई, नान बिट्टी, केता अउर जियालाल, श्यामबाई समेत बीस लोगन का कहब हवै कि गरीब मड़ई आहिन। गरीबी रेखा का राशन कार्ड नहीं बना हवै अउर न तौ रानी लक्ष्मी बाई योजना का लाभ मिलत हवै। यहिके खातिर हम चार बरस से परेशान हन। हम जइसे गरीबन के सुनै वाला कउनौ नहीं हवै। मेहनत मजूरी कइके आपन परिवार वालेन का पेट भरित हन। रानी लक्ष्मीबाई योजना का लाभ लें खातिर कइयौ दरकी प्रधान से कहे हन, पै वा ध्यान नहीं देत हवै। का सरकार के लगे हमरे दें खातिर रुपिया नहीं हवै। काहे से कि हमरे लगे एकौ बिसुवा जमीन भी नहीं हवै। सरकार गरीबन खातिर योजना चलावत हवै,पै उंई योजना का लाभ भी पात्र मड़इन का मिलै के जरुरत हवै। तबहिने योजना सफल होइ सकत हवै। नहीं तौ का फायदा कि गरीब अउर पात्र मड़ई योजना का लाभ लें खातिर चार-चार बरस से भटकत हिंया हुंवा फिरत रहत हवैं या समस्या का लइके प्रधान एगसिया से बात कीन गे। वहिकर कहब हवै कि राशन कार्ड के फार्म भरे गंे हवै। रानी लक्ष्मीबाई योजना के भरवाये जइहैं तौ मड़इन के भरवा दीन जई।