घर मा घुस के मारपीट

bisanda marpatiजिला बांदा, ब्लाक बिसण्डा, थाना अउर कस्बा बिसण्डा। हेंया दुई परिवार के आपसी लड़ाई पुलिस थाना करैं का मजबूर कई दिहिस। 26 अक्टूबर का एस.पी. से कारवाही करैं के मांग कीन गे है।
दरखास दें आये चुन्नू उर्फ हप्ता का कहब है कि 21 अक्टूबर का सुबेरे दस बजे मोर महतारी अउर औरत मंदिर गई रहैं। पड़ोसी गया चरण निर्मल के औरत अउर महतारी भी मंदिर गे रहैं। दूनौ पक्ष के बीच कउनौ बात का लइके कहा सुनी भे। मोर महतारी गया चरण निर्मल के घर उलहना दें गे। नाराज होइके मंगलवा, बबलू, गया चरण निर्मल, मिया उर्फ अजय, सुनील, अरविन्द, शिवसखी एक जुट होइके, तमंचा, फर्सा, कुल्हाड़ी अउर लाठी लइके दरवाजा मा ललकारैं लाग। जंगला अउर दरवाजा तोड़ के घर घुस आय। मोरे भाई मोनू धमेन्द्र, पंकज, प्रेम अउर महतारी रूखमिन का मार मार घायल कई दिहिन। औरत रेखा का भी मार के घायल कइके छेडखानी करिन। घटना के शोर सुन के गया चरण निर्मल के रिश्तेदार दुर्गा छोटू राकेश जोगिया, बेला, दुर्गा का दमाद पूला आ गे। अउर गाली के साथै जान से मारैं के धमकी दिहिन। बबलू हाथ मा लीने तमंचा से एक गोली चलाइस। साथै जेवर अउर नगद रूपिया छीन लइगे। शोर सुन के मोहल्ला के लोग बीच बचाव करिन। गया चरण निर्मल बसपा का नेता अउर पेट्रोल पम्प मालिक है। या मारे गांव वाले कउनौ गवाही दें का तैयार निहाय। घटना के सूचना दें मा न तौ एन.सी.आर. लिखी गे अउर न ही हमार मेडिकल भा आय। या मारे एस.पी. से नियाव के मांग है। एस.पी. आर.पी. पाण्डेय का कहब है कि मामला गम्भीर है। पूरे मामला के छानबीन कइके उचित कारवाही कीन जई।