गाज गिरे से चार आदमी नौ जानवरन की मोत

M Taza khbarमहोबा जिला के अलग-अलग गांवन में 20 सितम्बर खा गाज गिरें से चार आदमी ओर नौ जानवरन की मोत हो गई हे। विभाग वाले मुआवजा देय की बात कहत हे।
ब्लाक जैतपुर गांव सिरमोन, एते को विजय कुमार कहत हे कि मोयी गाय खेत में चरत हती। तभई पानी बरसो, बिजली चमकी ओर गाज गिरें से गाय की मोत हो गई।
एसई ब्लाक पनवाड़ी, गांव तुर्रा मोहारी के 35 साल के भागीरथ पुत्र परसराम खेत में उड़द काटत हतो। बारिस ओर बिजली चमके के कारन बेरी के पेड़ तरे ठाड़ हो गओ। जीसे आकाशीय बिजली गिरें के कारन मोत हो गई हे। रिछा गांव में बिजली गिरे के कारन 26 साल के राजेन्द्र पुत्रा सुखलाल ओर आठ बकरी मर गई हे। ईखी सूचना पनवाड़ी थाना ओर कुलपहाड़ तहसील में दई हे। पुलिस ने पंचनामा भर पोष्टमार्टम खा भेज दओ हे। ब्लाक चरखारी, गांव कनेरा के 55 साल को मुन्ना 20 सितम्बर खा तिल काटत हतो। तभई गाज गिरे के कारन मोत हो गई हे। ईखी जनकारी गांव में दई इलाज के लाने चरखारी सरकारी अस्पताल लाये। जिते डाक्टर ने मरो बताओ हे।
कुलपहाड़ तहसीलदार रामजी बताउत हे कि जीखे गाज गिरे से मोत भई हे। ऊखे परिवार खे चार लाख रुपइया की चेक दओ जेहे। झुलसे हे ऊखी इलाज की रिपोर्ट के अनुसार रूपइया दओ जेहे। जानवरन को पोस्टमार्टम रिपोर्ट आयें के बाद जानवरन को दैवीय आपदा के तहत मिलहे।