गांव रोवै विकास खातिर

25-07-13 Banda Gaonजिला बांदा, ब्लाक बड़ोखर खुर्द, गांव भवानी पुरवा का मजरा गोड़ी बाबा का पुरवा। या मजरा 2011-12 मा लोहिया समग्र योजना के तहत लीन गा है, पै विकास के सबै काम अधूरे हैं। प्रधान शिवस्वरूप द्विवेदी उर्फ बिट्टू भइया या पुरवा के बिल्कुल ध्यान नहीं देत आय।
मजरा के रहैं वाले भगवानदीन, जगदीश अउर कल्लू बताइन लोहिया समग्र ग्राम होय के समय डी.एम. के आवैं से मीटिंग खातिर बुलावा गा रहै। नहीं तौ कतौ मीटिंग नहीं होय। या मजरा मा आबादी लगभग ढ़ाई हजार अउर वोटर पांच सौ है। सबै केवट जाति के लोग रहत हैं। हेंया आठ अउर नौ वार्ड लागत है। कउनौतान से बिजली के खम्भा तौ लाग है उंई भी देखैं भर है। न कनेक्शन हैं अउर न बिजली आवत आय। गांव मा एक सौ तीस शौचालय, बाइस इन्द्रा आवास, तीन लोहिया आवास, एक माडल तालाब लोहिया समग्र योजना के बने है। बाकी सबै काम से प्रधान कउनौ मतलब नहीं राखे आय।
प्रधान शिवस्वरूप द्विवेदी उर्फ बिट्टू भइया का कहब है कि जउन काम ग्राम पंचायत के तहत आवत हैं उंई काम सबै होइगे हैं। बाकी विभाग जइसे पी.डब्लू.डी., बिजली विभाग नहीं करावत आय। मैं कइयौ दरकी अधिकारिन का लिखित दरखास दई चुके हौं, पै कारवाही नहीं भे। सी.डी.ओ. प्रमोद शर्मा अउर डी.पी.आर.ओ. प्रवीण मोहन श्रीवास्तव कहत हैं कि बाकी काम खातिर बजट निहाय। या मारे काम नहीं होत आय।