गर्मी ने किया हाल बेहाल ऊपर से हैंडपंप भी खराब देखिए चित्रकूट जिले के राजापुर कस्बे का हाल

चित्रकूट जिले के ब्लाक रामनगर कस्बा राजापुर मा लाग हैंडपंप पांच महीना से खराब हवैं। या भीषण गर्मी मा लगभग पांच सौ मड़ई पानी के खातिर परेशान हवैं।

कल्लू सोनकर का कहब हवै कि लगभग चार पांच महीना से हिंया के नल ख़राब हवै। हिंया न,तौ सप्लाई वाला पानी आवत आय अउर न तौ पाईपलाइन दौडावत आय। हैंडपंप सही से चलत नहीं आहीं। रिबोर के चार हैंडपंप हैंडपंप पड़े हवैं, उनकर व्यवस्था नहीं होत आय। मनसुखलाल बताइस हवै कि सप्लाई नहीं होत आय अउर न तौ पानी देत आय। चाहे ठंडी होय या गर्मी होय पानी के बहुते दिक्कत हवै। राजेश कुमार का कहब हवै कि एक नल बनवायें हौ, तौ एक बिगड़ गा हवै। कहत हवै कि पाइप खराब हवैं,तौ पाईप डारै का कहे हौं, तौ कहत रहै, कि का करिहौं। हिंया बिना नंबर के एक गिलास पानी नहीं मिल सकत आय चाहे कउनौ पियासा मर जाय। लक्ष्मी बताइस हवै कि एक नल लाग हवै वा नल मा पूरे गांव के मड़ई पानी भरत हवैं। रात 4 बजे से मड़ई पानी भरै लागत हवैं अउर दिन मा मड़ई लड़ाई झगड़ा करै लागत हवैं।

चेयरमैन प्रतिनिधि आदर्श दिवेदी का कहब हवै कि रिबोर का कार्यप्रणाली शीघ्र ही ठीक कीन जई। जउन नल खराब हवैं उनका नगर पंचायत के जल संस्थान के नेतृत्व मा ठीक कराए जइहें। 15 हैंडपंप स्वीकृत भे हवैं। एक कारखाने के वार्ड नंबर मा लगा दीन गा हवै।

रिपोर्टर: सहोद्रा

Published on May 14, 2018