गढ़वा गढ़वा होइगे सड़क

CHITRAचित्रकूट जिला, ब्लाक कर्वी, कसहाई रोड से राजापुर अउर पहाड़ी। हिंया से आवै जाये वाली सड़क के बीच मा बड़े बड़े गढ़वा हवै। या समस्या पांच बरस से बनी हवै। साधन मा आवैं जाये मा बहुतै डेर बना रहत हवै कि कत्तौ साधन न पलट जाये, पै या समस्या कउनौ अधिकारिन का नही देखाई देत हवै। पहाड़ी ब्लाक, गांव बन्ना गढ़वार का लवकुश 28 जून 2014 का राजापुर ट्रैक्टर मा सामान कोटा से लइके आवत रहै तौ ट्रैक्टर पलटै से बचा हवै। कंठीपुर गांव के लगभग दस लोगन का कहब हवै कि सड़क के हालत देख जीव कांप उठत हवै। पी.डब्ल्यू.डी. विभाग के अधिशाषी अभियंता अजय कुमार कहिन कि एक करोड़ रुपिया सड़क बनवावै का पास होइगा हवै अब काम लागी।