गड्ढा मुक्त सड़क के वादे पर चित्रकूट जिले के खोहर गांव के लोग उठा रहे सवाल

सरकार एक कइत आपन गुण गावै मा लाग हवै हुंवा दूसर कइत चित्रकूट जिला के खोहर गांव मा गड्ढा मुक्त सड़क के वादा मा सवाल उठत हवै, काहे से खोहर से चूहड़ा तक के सड़क आज तक नहीं बनी आय।
धर्मेन्द्र कुमार यादव का कहब हवै कि रात के समय कउनौ बीमार पड़ जायें या डिलेवरी वाली मेहरियन खातिर फोन लगावै तौ खराब सड़क के कारन हिंया कउनौ वाहन नहीं आवत आहीं। खराब सड़क मा जायें मा बहुतै समय लागत हवै तौ मरीज के हालत अउर ज्यादा खराब होइ जात हवै। सरकार सड़क का गड्ढा मुक्त करै का कहत रहै पै हिंया के सड़क के हाल जस के तस हवै। रमाकांत का कहब हवै कि हिंया के सड़क का गड्ढा मुक्त करिन आहीं न करिहैं। हिंया खायें वाले आवत हवै काम करै वाले नहीं। हमार दुकान मा रोज सड़क के कारन पचासन मड़ई पंचर बनवावै आवत हवैं। गयाप्रसाद बताइस कि मैं आपन मेहरिया का आपरेशन के बाद साइकिल से लई गये हौं, काहे से हिंया कउनौ वाहन नहीं आवत आय। मुलायम सिंह यादव का कहब हवै कि साइकिल पंचर होइ जात हवै तौ तीन किलोमीटर घसीट के लइ जाये का पड़त हवै।
पीडब्ल्यूडी विभाग के ज़ेई रवि कुमार का कहब हवै कि टेंडर का काम पूरा होइगा हवै तौ सड़क बनावै का काम जल्दी चालू कीन जई।

रिपोर्टर- सुनीता देवी

Published on Mar 27, 2018