गड्ढ़ा खनके पानी बहबई छी

गड्ढ़ा में बहईत गंदा पानी
गड्ढ़ा में बहईत गंदा पानी

जिला शिवहर , प्रखण्ड तरियानी, पंचायत बेलहिया, गांव खाजेपुर। इहां नाली न रहे के कारण गंदा पानी के बहाव न हो रहल हई। जेई कारण लोग सब के पानी बहावे में दिक्कत हो रहल हई।
इहां के जतनम देवी, मंजू देवी, शिवबालक साह कहलथिन कि दोसरा जगह नाली बनल हई त बेकार पानी ओही माहे निकलई छई। लेकिन ऐई गांव में त नाली बने के नामों निशान न हई। एगो त हमरा सब के जगह कम हय त ओही में गड्ढ़ा खन के पानी बहबई छी। लेकिन जब बरसा होई छई त पानी उपट के दुरा, आंगन में चल जाई छई। यदि नाली रहतियई त पानी निकासी के साधन रहतियई। गडढ़ा में पानी जमा रहई छई त मच्छर, किड़ा फर जाई छई। सरकार प्रचार-प्रसार करबई छथिन कि गंदगी दूर भगावे के लेल त ओई गंदा पानी से गंदगी न होई छई। सबसे त बिमारी के जर जल जमाव ही हई।
वार्ड सदस्य मालती देवी कहलथिन कि पानी बहावे के दिक्कत त होईते हई। पंचायत में बैठक होतई त आवेदन देबई नाली के लेल।
मुखिया उपेन्द्र साह कहलथिन कि जेई वार्ड चाहे गांव में समस्या हई। ओई के लेल वार्ड सदस्य पंचायत में आवेदन देथिन तब न हम जनबई। प्रखण्ड विकास पदाधिकारी डाॅक्टर संजय कुमार सिंह कहलथिन कि पंचायत के जे भी काम होई छई। उ मुखिया करा सकई छथिन।