खाना बनाए खां नई मिलो वेतन

जिला महोबा, ब्लाक चरखारी, गांव अस्थौन। एते के प्राथमिक स्कूल मे खाना बनाए वाली ओरतन खां दस महिना से वेतन नई मिलो आए। जीसे ऊं लोगन खां घर को खर्च चलाए मे बोहतई परेशानी आउत हे।
खाना बनाए वाली रूपरानी ओर शीला ने बताओ कि हम ई स्कूल में दो साल से खाना बनाएं खों काम करत हें। हम लोगन खों पेहले समय से रूपइया मिल जात हतो। पे ई साल में जुलाई 2012 से हमाओ वेतन नई मिलो आय। स्कूल मे खाना बनाएं के ऊमें कोनऊ काम भी नई कर पाउत हें। जीसे घर को खर्चा चल सके, काय से सुबरे से लेके दोपहर तक खो समय खाना बनाएं मे लग जात हे। सरकार एक हजार रूपईया वेतन देत हे । जीसे हमाए घर को खाना खर्चा, दवाई, ओर बच्चन की पढ़ाई को पूरो नई हो पाउत हे। ई साल मे जुलाई से हमाओ एकऊ रूपईया नई मिलो आय। जीसे हमे बोहतई परेषानी उठाने परत हे। ईखे लाने हमने केऊ दइया हेडमास्टर से कहो हेकि हमाओ वेतन को रूपइया दे देओ पे कोनऊ नई सुनत आय।
हेडमास्टर शारदा गुप्ता ने बताओ कि मेने केऊ दइया ंबी.आर.सी. मे कहो हे, ओर बी.एस.ए. विभाग में लिखित दरखास दई हे। पे अभे तक कोनऊ पता नइयां कि ऊनखों रूपइया काय नई आउत आए।
बेशिक शिक्षा अधिकारी मुसीहुज्जुमा ने बताओ कि लेखा अधिकारी रिटायर हो गओ हतो, एईसे रूपइया नई भेज पाओ हें। अभे दूसर लेखा
अधिकारी आओ हें तो सबखों रूपइया भेज दओ जेहें।