खराब हैण्डपम्प, कहां मिलै पानी

Handpampचित्रकूट जिला के गांवन मा हैण्डपम्प खराब होय के कारन मड़ई पियै खातिर पानी के समस्या से जूझत हवैं। या समस्या मजरा जमिरा कालोनी अउर रामनगर ब्लाक, कस्बा रामनगर मा हवै।
मजरा जमिरा कालोनी के सुमन अउर रेखा का कहब हवै कि सौ घर के बीच मा एक हैण्डपम्प लाग रहै। वहौ खराब होइगा हवै। यहिसे पियै खातिर पानी लें सड़क पार कइके आधा किलो मीटर दूर जाये का परत हवै। सड़क पार करै मा एक्सीडेंट होय का डेर बना रहत हवै। हैण्डपम्प सुधरावै खातिर प्रधान मिठाईलाल से 19 अगस्त का कहा गा, पै वा ध्यान नही देत हवै।
प्रधान मिठाईलाल का कहब हवै कि हैण्डपम्प बनवावै खातिर बजट नही आवा आय। यहिसे हैण्डपम्प नही सुधरावा गा हवै।
मऊ ब्लाक के ए. डी .ओ. शिवकान्त मिश्रा का कहब हवै कि अब प्रधान के खाता मा हैण्डपम्प सुधरावै खातिर बजट न अई। दूसर पंचवर्षीय मा बनै वाला प्रधान हैण्डपम्प बनवा सकत हवै।
ब्लाक रामनगर, कस्बा रामनगर के भगवानदास, रानी अउर कल्लू का कहब हवै कि हैण्डपम्प खराब हवै। हैण्डपम्प खराब होय के कारन रोजै के आवै जाये वाले लगभग हजारन मड़ई पियै खातिर पानी का तरसत हवैं। मडई हैण्डपम्प बनवावै खातिर 5 सिंतबर का प्रधान कामता प्रसाद से मांग करिन। प्रधान कामता प्रसाद का कहब हवै कि हैण्डपम्प बनवावै खातिर ब्लाक मा लिखित दीने हौं। हुंवा से पास होइ तो हैण्डपम्प बनवावा जई। मोरे लग तौ बजट नहीं आय कि मै अपने सं हैण्डपमप बनवा सकौं।
रामनगर बी.डी.ओ. राकेश सोनी कहिन कि लिस्ट बना के सरकार के लगे भेज दीन गे हवै। हैण्डपम्प पास होइ तौ बनवावा जइै।