कोटेदार पै राशन मा कटौती का आरोप

rashanगांव देवगढ़, ब्लॉक पूरा बाज़ार, जिला फैजाबाद। हिंआ दस बी.पी.एल. राशन कार्डधारक का नवम्बर मा कोटेदार दस किलौ कम राशन दिहिन जेसे गांव कै मनई विरोध करिन।
मायादेवी, नरायन देयी बताइन कि हमरे सबका राशन पूरा नाय मिलत। तीन दिन राशन 7,10,14 तारीख का राशन दियै कै नियम बाय। पहले दिन जे न लै पावै ऊ दुसरे दिन लै लियै। पन्द्रह किलो गेहूं पचीस किलो चावल मिलै का चाही। लकिन वहू महसे दस किलौ काट लियाथे। गरीब मनई मजदूरी कइके खर्चा चलाय जाथै। एक सहारा उहौ पूरा नाय मिलत।
भगौती, अतुल कुमार बताइन कि हमरे सब मेहनत मजदूरी कइके परिवार चलाईथी। कभौ लेबर कै मजदूरी तौ कभौ मनरेगा कउनौ भी तरह से एक एक पैसा जुटाई थी। राशन ज्यादा अउर सस्ता दाम मा मिल जात रहा वहू मा कम दिहिन। कोटेदार कहाथिन राषन कम बाय दुबारा आये तौ मिले। इहै कहत बीत जाथै।
प्रधान रघुबीर बताइन कि कोटेदार राशन पूरा दियाथिन। अगर गांव वालेन का नाय मिलत तौ हमसे बतावै हम पूरा राशन देवाउब।
कोटेदार कै पत्नी सरिता सिंह बताइन कि हम पूरा राशन गांव वालेन का दीथी। गांव वाले झूठा अरोप लगावाथिन।
बी.डी.ओ. महेन्द्र देव बताइन कि हम राशन कै जांच कराउब – केतना आवाथै वकरे बाद कार्यवाही होये।