केकरा मिलतई इंदिराआवास?

ऐई घर में रहई छई अनिता के परिवार
ऐई घर में रहई छई अनिता के परिवार

जिला सीतामढ़ी, प्रखण्ड बथनाहा, गांव, पंचायत बथनाहा पूर्वी, वार्ड नम्बर दु। इहां राजकिशोर दास के घर लगभग एक साल पहिले गिर गेलई। उ छौ महिना भाड़ा के मकान में रहलई। लेकिन आई तक उनका इंदिराआवास न मिललई।
उनकर पत्नी अनिता देवी कहलथिन कि सब लोग के इंदिराआवास वाला घर मिलई छई। हमर घर भी गिर गेल त सब बच्चा के लेके कुछ दिन भाड़ा के मकान में रहली लेकिन रूपईया न दे सकली। अब सब बच्चा के लेके ठंढ़ा के दिन में ऐई घर में साड़ी अउर पलास्टिक के बोरा ताऩ के रहई छी। मुखिया के कहली लेकिन उ कोई न देलक।
मुखिया अर्चना झा के पति रंजन झा कहलथिन कि उनकर नाम बी.पी.एल. में न हई। ऐही से उनका इंदिराआवास न मिल रहल हई। ऐई समस्या के लेके कोई सर्वे न होलई, न त उनकर नाम जोड़ा जतियई।
प्रखण्ड विकास पदाधिकारी वसंत कुमार सिंह कहलथिन कि अगर एस.एस.टी. रहतियई त हम सर्वे करा के इंदिराआवास दे देतियई। लेकिन अति पिछड़ा के लेल बिना बी.पी.एल. के कोई विकल्प न हई।