कुत्तन के लास देख गांव मा सनसनी

पोस्टमार्टम करत डाक्टरन के टीम
पोस्टमार्टम करत डाक्टरन के टीम

बांदा जिला के गांव तिंदवारा मा 9 अक्टूबर का इकट्ठा छह कुत्तन के लाश देख के मड़इन के बीच अफरा तफरी मच गे। सूचना पा के मउके मा पहुंचा प्रषासन मामला के जांच करिस है।
गांव के मड़ई बताइन कि सुबेरे कुत्तन के लाश देख के कुछ मड़ई तुरतै पुलिस का सूचना दिहिन। या सूचना प्रशासन मा आगी जइसे फइल गे। पषु पालन विभाग से जांच करैं दुई डाक्टरन के टीम भी पहुंची। पषु चिकित्सा अधिकारी डाक्टर एस.के. कनौजिया अउर डिफ्टी सी.वी.ओ. डाक्टर महेश प्रसाद पोस्टमार्टम करैं के बाद बताइन कि पोस्टमार्टम रिपोर्ट आवैं के बाद ही कुछ पता चली। गांव के कुछ मड़ई बाल्मीकि समुदाय के ऊपर कुत्तन का जहर दें का आरोप लगाइन। काहे से कुत्ता उनके सुअरन का परेशान करत रहैं। जबै कि बाल्मीकि समुदाय के मड़ई या बात का नहीं मानिन। प्रधान अनिल कुमार द्विवेदी कहिन कि कुत्तन का मारैं के साजिश चोर या गुण्ड़ा भी कई सकत हैं। शहर कोतवाली के दीवान कुंज बिहारी कहिन कि अगर या मामला के दरखास पुलिस तक अई तौ कारवाही कीन जई