का होइ हम सब का

घर बिगाड़ै का दिहिन नोटिस
घर बिगाड़ै का दिहिन नोटिस

जिला चित्रकूट, ब्लाक कर्वी, गांव डिलौंरा मजरा कुलीतलइया। हिंया के कमलेश, बब्बू, मेडि़या, बच्चीलाल, बच्चा समेत दस लोगन के नाम सरकार कइती से जमीन खाली करै का नोटिस आगे हवै। जउन कि इं गरीब मड़ई वा जमीन मा तीन पीढ़ी से डेढ़ सौ लोग रहत हवै। या बात का लगभग पन्द्रह मड़ई बताइन।
कमलेश, बब्बू, मेडि़या, बच्चा समेत दस लोगन का कहब हवै कि या तालाब के जमीन गांव समाज मा आवत हवै। यहिमा हम तीन पीढ़ी से रहित हवै। अब सरकार हम गरीबन से या जमीन छीनत हवै। हमार घर गिर जइहैं तौ हम कहां रहिबे। हम गरीबन के जउन एक एक बीघा जमीन रहै वा भी सरकारी अस्पताल अउर हवाई पट्टी मा सरकार लई लिहिस हवै। एक बीघा जमीन का मुआवजा पचीस हजार रूपिया दिहिस हवै। जउन कि हमार जमीन ज्यादा रूपिया के रही हवै। अब हम कहां जइबे?
या मामला मा लघू सिंचाई विभाग के अभियन्ता रामनरेश का कहब हवै कि उनका या मामला के जानकारी तौ हवै, जमीन उनका हटावै खातिर अठारह लोगन का नोटिस भी 13 जुलाई 2013 का भेजा गा रहै। 16 अगस्त 2013 तक खाली करै खातिर कहा गा रहै, पै उंई नहीं सुनत आहीं।