का गन्दगी से कभऊ पाछु छूटहे

जिला महोबा, ब्लाक जैतपुर कस्बा कुलपहाड़। एते पे रोडवेज बस स्टैण्ड दसन साल से अभे तक कच्चा परो हे। यई से पूरे बस स्टैण्ड में हैण्डपम्प को पानी भर जात हे।
ई बस स्टाप के रोडवेज कर्मचारी टिकट बाबू नफीस खान के बताये से ई पता चलत हे। कि एते लगभग चालिस बसे चलत हे। कि एते खे व्यवस्था में ध्यान नई दओ आय। जीसे अव्यवस्था खे शिकार होय खे परत हे।
एते बेठे यात्री चन्द्रभान, जगतराज, जाहर सिंह ने बताओ कि एते बनो प्रतीक्षालय देखे से एसो लगत हे। जेसे ऊखी सफाई कभऊं नई होत आय। ओते लगो हैण्डपम्प को पानी निकरे खे लाने नाली भी सई से नई बनी आय। ई कारन से ऊखो पानी पूरे स्टैण्ड में भर जात हे। ओते परिवहन विभाग की ओर से शौचालय भी बने हे। पे ओते हमेशा ताला लगो रहत हे। आदमी ओरतन के लाने शौचालय खुलो तो रहत हे पे बोहतई गन्दो रहत हे। शौचालय की सफाई करे वाली राजा बेटी ने बताओ आदमी जबरन शौच कर लेत हें। ओर रूपइया नई देत आय। यई से मेने ताला लगाओ हे। काये से यई रूपइया से मोओ खर्च चलत हे। मोए अलग से कोनऊ रूपइया नई मिलत आय। ई शौचालय को परिवहन विभाग को ठेका हे।
महोबा परिवहन विभाग के अधिकारी ए.के. सुमन ने बताओ कि हम प्रस्ताव बना के शासन के एते भेज सकत हे। बाकी तो हम कछु नई कर सकत हे। अगर ऊदाई सफाई करत हे ओर ऊखे कछु नई मिलत तो हमें एक आवेदन करें । तो हम आगे कछू कर सकत हे।