कालोनी आवंटन मा धांधली का आरोप, जांच के मांग

Exif_JPEG_420जिला बांदा, ब्लाक महुआ, ग्राम पंचायत गुमाई, मजरा सुखारी का पुरवा। या गांव के मड़ई कलक्ट्रेट अउर विकास भवन मा धरना प्रदर्शन कइके ए.डी.एम. का ज्ञापन दिहिन। जेहिमा कहिन कि उनके गांव मा कालोनी आवंटन मा धांधली का आरोप लगावत जांच के मांग करिन हैं।
गांव के मुन्नीलाल, चम्पा, राजाबेटी अउर गंगादीन सहित पचासन लोग दीन गे दरखास मा कहिन कि हमरे पुरवा मा सब दलित अउर गरीबी रेखा से नीचे जीवन यापन करैं वाले लोग हैं। ग्राम पंचायत मा 362 कालोनी का आवंटन प्रधानमंत्री योजना के तहत कीन गा रहै। जेहिमा ज्यादातर कालोनी अमीर अउर अपात्र लोगन का दीन गई हैं। साथै या भी बताइन कि जउन एक दरकी कलोनी का लाभ पा भी चुका है। वहिका भी दुबारा दीन जात हैं। आवंटन के खातिर न खुली बइठक कराई गे न कउनौ का जानकारी दीन गे आय। जबैकि बइठक अउर मुनादी के माध्यम से आवंटन होय का चाही। उंई या भी कहिन कि हमरे सुखारी का पुरवा मा हम जइसे बहुत पात्र लोग हैं। जेहिके पास रहैं का घर तक निहाय अउर छानी छप्पर से घर बना के बसर करत हैं, पै उनका कालोनी स्वीकृत नहीं कीन गई आय। इनतान का भेद भाव का रवइया अपना के अपात्र लोगन का फायदा पहुंचावा जात है। जेहिसे हम लोग गांव मा आवंटन कीन गई कालोनीन के जांच खातिर डी.एम. अउर सी.डी.ओ. का दरखास दइके गांव मा आवंटन कीन गई कालोनी का जांच कइके पात्र लोगन का दीन जाय के मांग कीन है।
ए.डी.एम.गंगाराम कहिन कि बीडीओ का आदेश कइके गांव के जांच कराई जई। अगर उंई लोगन के सूची मा नाम हैं, तौ कालोनी दीन जइहैं।

रिपोर्टर –  गीता और शिवदेवी